Parlamentoya Ewropayê (PE) du sererastkirinên ku polîtîkayên koçberiyê tûjtir dikin qebûl kirin û hewl dide koçberan bişîne welatên sêyemîn.
Sererastkirinên nû, rayeyê dide welatên endamên Yekîtiya Ewropayê (YE) ku penaberan bişînin welatên sêyem ên ku ji derveyî welatên wan in û ji aliyê Yekîtiya Ewropayê ve wekî “ewle” tên pejirandin.
Ev sepan niha ji aliyê Serokwezîra Îtalyayê Giorgia Meloni ve bi navendên ku li Albanyayê hatine avakirin tê ceribandin. Lê tê payîn ku ev modela ku heta niha bi astengiyên hiqûqî re rû bi rû dima, bi rêziknameyên nû yên hatine qebûlkirin re hêsantir pêk bê.
Rêxistinên mafên mirovan û partiyên çep bi tundî bertek nîşanî biryarê dan. Parlamentera Keskan Mélissa Camara, sererastkirinan wekî “di bêmirovkirina polîtîkaya koçberiyê ya YEyê de gaveke nû” pênase kir û got ku rûmeta penaberan hatiye piştguhkirin.
Komîsyona Ewropayê jî rexne red kirin û parast ku ew welatên ku wê penaberan bişînin, penaber neçar in ku rêzê li mafên bingehîn ên mirovan bigirin.
Yek ji xalên herî baldar ên tekstên hatine qebûlkirin, avakirina lîsteya “welatên ewle” ya YEyê bû. Bi saya vê lîsteya ku welatên wekî Kosova, Bangladeş, Kolombiya, Misir, Hindistan, Fas û Tûnisê tê de cih digirin, serlêdanên penaberiyê yên kesên ji van welatan tên wê bên lezandin û pêvajoyên vegerandinê ango dersînorkirin wê hêsantir bibin.
