Enqere – Hevserokê KNKê Ahmet Karamus anî ziman ku bi êrişên li ser Îranê û geşedanên li Rojhilata Navîn re yekîtiya neteweyî ya Kurd li ser partiyên Kurd ferz bûye û got: “Tirkiye jî amadekariyan dike ku li dijî Rojhilatê Kurdistanê destwerdanê bike. Divê em hişyar bin. Divê em dereng nemînin û zûtir yekîtiya xwe ava bikin.”
Hezên hegemon bi taybetî jî Amerîka û Îsraîl li gorî berjewendiyên xwe Rojhilata Navîn ji nû ve dîzayn dikin. Salên dûr û dirêj in li Rojhilata Navîn şer berdewam dike. Ji aliyekî ve gefxwarinên li dijî Iraqê didomin û her wiha geşedanên li Rojvayê Kurdistanê û Sûriyeyê her di rojevê de ne. Li aliyekî ev geşedan diqewimin li aliyê din jî êrişên Îsraîl û Amerîkayê yên li dijî Îranê di 28ê Sibatê de dest pê kir. Rojeva cîhanê li ser vî şerî ye.
Piştî kuştina Rêberê Olî yê Îranê Ayetulah Elî Xamaneyî li Îranê rewşeke çawa dê rû bide ji aliyê raya giştî ve jî tê meraqkirin. Partiyên Kurd ên li Rojhilatê Kurdistanê weke Partiya Jiyana Azad ya Kurdistanê (PJAK), Partiya Azadî ya Kurdistanê (PAK), Partiya Demokratîk ya Kurdistanê-Îranê, Sazmanî Xebatê ya Kurdistan yê-Îranê û Komeleya Zehmetkêşan ya Kurdistanê beriya niha bi çend rojan yekîtiya xwe ragihandibûn. Êrişên li ser Îranê dê bandoreke çawa li Rojhilatê Kurdistanê bike jî tê meraqkirin.
Rêberê Gelê Kurd Abdullah Ocalan jî hem di parêznameyên xwe de û hem jî di hevdîtina dawî de bal kişandibû ser Îranê û hişyariya şerekî kiribû. Rêberê Gelê Kurd Abdullah Ocalan her wiha ji bo parastina Rojhilatê Kurdistanê ji şer jî partiyên Kurd hişyar kiribû ku yekitiya xwe ava bikin. Piştî êrişên li ser Rojava vir ve yekitiya neteweyî ya Kurd di rojevê de ye. Geşedanên li Rojhilata Navîn û xetereya li ser Kurdistanê jî yekîtiya neteweyî li ser partiyên Kurd ferz dike.
Hevserokê Kongreya Neteweyî ya Kurdistanê (KNK) Ahmet Karamus têkildarî girîngiya yekîtiya neteweyî û şerê li Îranê ji Ajansa Welat (AW) re axivî.
‘Ji bo yekîtiya neteweyî bingeheke xurt heye’
Ahmet Karamus anî ziman ku yekîtiya neteweyî ya gelê Kurd piştî êrişên li ser Rojava ava bûye û Kurd li hemû cîhanê xwedî yek deng û yek helwest in. Ahmet Karamus bi lêv kir ku ji bo yekîtiya neteweyî bingeheke xurt ava bûye û wiha got: “Li Başûrê Kurdistanê hem di asta gel de û hem jî di asta partiyên siyasî de yekîtiyeke xurt ava bû. Her wiha li diyasporayê jî helwesta gelê Kurd bingeheke pir xurt ji bo avakirina yekîtiya neteweyî çêkir. Partiyên siyasî dê çawa vê bixin meriyetê di rojeva me de ye. Gelek nîqaş, danûstandin û xebatên me jî hene. Gel ji bo avakirina yekîtiya neteweyî peyam da partiyên Kurd. Êdî erka partiyên Kurd ew e ku li gorî vê peyama gel yekîtiya xwe ava bikin. Helwest û yekîtiya neteweyî ya gelê Kurd dikare bandoreke mezin li ser destkeftiyên Kurdan bike. Yekrêzî û yekhelwestiya gel di xwepeşandanên li dijî êrişên li ser Rojava de nîşan da.”
‘Pêwîstî bi kongreyeke yekîtiya neteweyî heye’
Ahmet Karamus destnîşan kir ku geşedanên li Rojhilata Navîn û êrişên li ser Îranê yekîtiya neteweyî li ser Kurdan û partiyên Kurdan ferz dike û axaftina xwe wiha domand: “Krîzên li herêmê rû didin sînyalên pirr girîng didin. Gelê Kurd bi yekîtî û yekrêziya xwe dernekeve pêşberî cîhanê metirsiyeke mezin dê ji bo çar aliyên Kurdistanê derkeve. Dîzayna li Rojhilata Navîn îro bi cih dibe û pêk te. Em derbasî qonaxeke nû û rewşeke nû bûn. Heke em di vir de helwesta xwe diyar nekin û yekrêziya xwe pêk neynin xetere heye ku em sedsaleke din winda bikin. Îro em di vê qonaxê de ne. Weke KNKê em jî çend sal in ji bo avakirina yekîtiya neteweyî ya Kurd xebatên xwe dikin. Pêdivî bi kongreyeke yekîtiya neteweyî ya Kurd heye ku hemû partî werin cem hev, stratejiyek hevpar deynin û bi hevdû re hevkariyê bikin. Heke tiştek bikeve ser milê me em ê bikin. Hewldan û danûstandinên me bi partiyên Kurd re ji bo kongreyeke yekîtiya neteweyî berdewam dikin.”
‘Rola partiyên Kurd ji bo çareseriya Rojhilat û Îranê girîng e’
Ahmet Karamus bal kişand ser yekîtiya 5 partiyên Kurd ên li Rojhilatê Kurdistanê û axaftina xwe wiha domand: “Çend sal in ji bo ku li Rojhilatê Kurdistanê yekîtiya Kurd pêk were xebat hebûn. Bi taybetî jî piştî qetilkirina Jîna Emînî û berbelavbûna xwepeşendanên ‘Jin jiyan azadî’ di rojevê de bû. Bi êrişên dawî yên li ser Îranê re girîngiya yekîtiya neteweyî ya Kurd careke din derket holê. Aqûbeta Îranê hê ne diyar e. Li Îranê rewşeke nû pêk tê. Hêza herî xurt û yekrêzî Kurd in. Ji bo wê jî rola partiyên Kurd ji bo çareseriya Rojhilat û Îranê girîng e. Li Îranê konjektoreke çawa dê pêk were em jî ji nêz ve dişopînin. Divê ne tenê 5 partî divê hemû sazî û dezgehên Kurd li Kurdistanê ji bo Rojhilat yekîtiyeke xurt ava bikin. Ew erka hemû partiyên Kurdistanê ye. Ev yekrêzî dê pêşiya Bakur û Başûr jî vebike û bandoreke erênî li ser Rojava jî bike. Li kîjan parçeyî destkêftî pêk were dê bandorê li ser parçeyên din jî bike.”
‘Tirkiye amadekariyê dike ku li dijî Rojhilat destwerdanê bike’
Ahmet Karamus destnîşan kir ku piştî êrişên li ser Îranê Tirkiye ji bo li dijî Rojhilatê Kurdistanê destwerdanê bike amadekariyan dike û got: “Piştî êrişên li ser Îranê, Tirkiye jî haziriya xwe dike ku li dijî Rojhilatê Kurdistanê destwerdanê bike. Dewleta Tirk heke firsetê bibînê dê bike. Amerîka û Îsraîl pêwîstî bi tifaqeke dibînin ku tiştên li Îranê dixwazin bi cih werin. Ji bo wê di pêşerojê de dikarin roleke bidin Tirkiyeyê jî. Li Rojava piştî êrişan peymanek hat îmzekirin. Tirkiye ji vê peymanê ne razî ye û dixwaze têk bibe. Xetereya ew peyman têk biçe jî heye. Her çiqas Tirkiye gefan li Şengalê dixwe jî hedefa wan ne tenê Şengal e, di hedefa wan de Mexmûr û tevahî Başûrê Kurdistanê heye. Ji ber vê yekê jî gefên li dijî Şengalê bi Şengalê re sînorkirî nîn e. Ji bo wê jî divê em gelekî hesas bin. Xetereyeke mezin li ser hebûna gelê Kurd li çar aliyên Kurdistanê di rojeve de ye. Ji bo wê divê em bi hesasiyet û mesuliyeteke mezin rabin.”
‘Divê em dereng nemînin û zûtir yekîtiya xwe ava bikin’
Ahmet Karamus têkildarî xebatên wan ên ji bo yekîtiya neteweyî ya Kurd bi lêv kir ku wan bi partiyên Rojava û Başûr re jî hevdîtinan pêk anîne û axaftina xwe wiha bi dawî kir: “Ji bo yekîtiya neteweyî ya Kurdistanê rola Başûrê Kurdistanê pirr girîng e. Hewldan û hevdîtinên me jî bi partiyên Başûr re jî didome. Divê demildest partiyên Başûr nakokiyên di nav xwe de çareser bikin. Weke avakirina hikûmetê tifaqa xwe pêk bînin. Ji bo wê em bang li hemû partiyên Kurd dikin ku nakokiyên xwe bidin aliyekî û di vê serdema ku hebûn û tunebûna gelê Kurd di rojevê de ye yekîtiya xwe ava bikin. Divê em dereng nemînin û zûtir yekîtiya xwe ava bikin.”
