Hêzên hewayî yên Îsraîl û DYAyê li navenda Tehranê, navçeya Cîtgarê ya bi ser Tehranê ve û li bajarê Rojhilatê Kurdistanê Sinê bombardimanên nû pêk anîn. Hate ragihandin ku di êrişa li Tehranê de cihê rayedarên Îranê ji bo sevk û îdareyê bikar dianîn, hedef hate girtin. Çavkaniyan daxuyand ku liv û tevgera hewayî didome û kontrola esmanî ya Îranê êdi ketiye jêrbandora DYA û Îsraîlê.
Êrişên Îsraîl û DYAyê yên di çarçoveya operasyona, “Orîna Şêr” de bênavber berdewam dikin. Di seatên piştî nîvro de pêlek êrişên nû li ser bargeh û binkeyên rejîma Îranê pêk hatin. Çavkaniyên herêmî ragihandin ku piştî nîvro binkeyek rejîmê ya ji hêla rayedaran ve demkî dihat bikaranîn a li nêzî Stadyuma Azadî teqînên mezin pêk hatin. Çavkaniyan da zanîn ku tevgera balefirên şer li ser paytext Tehranê berdewam dike.
Windahiyên mirovî hene
Li gorî çavkaniyan dengê teqînan li gelek herêmên rojavayê Tahranê tên û êrişên nû yên esmanî li ser bingeh û tesîsên leşkerî yên Îranê berdewam dikin. Hin wêne û dîmenên belavbûyî jî nîşan didin ku li derdora Azadî Tower û Stadyuma Azadî dûman bilind dibe. Çavkaniyan da zanîn ku windahiyên mirovî hene lê hejmar nayê zanîn.
Li Sine û Çîtgarê teqîn
Her wiha çavkaniyên herêmî daxuyandin ku li navçeya Çîtgarê ya Tehranê û bajarê Rojhilatê Kurdistanê Sineyê jî bombardimanên nû pêk hatiye. Di dîmenên piştî lêdana balefirên şer ji hêla weşanên navneteweyî ve hatin belavkirin.
Îranê kontrola qada esmanî winda kir
Çavkaniyên herêmê ragihandin ku liv û tevgera balefirên şer ên Îsraîl û DYAyê bênavber berdewam dike. Çavkaniyan anîn ziman ku Îranê kontrola qada esmanî bi tevahî winda kiriye û êdî kontrol di destê Îsraîl û DYAyê de ye. Çavkaniyan daxuyand ku ji ber vê yekê jî êrişên balefirên şer êdî her seatê pêk tên û li ser bajaran gelek bi rihetî digerin.
