Amedsporê li sehaya xwe Manîsaspor 2 û 0 têk bir û di rêya şampiyontiyê de 3 pûanên girîng bi dest xist. Amedspor bi vê serkeftinê derket rêza duyemîn.
Di Lîga 1emîn a Trendyolê ya Federasyona Futbolê ya Tirkiyeyê (TFF) de Amedspor û Manîsaspor di hefteya 31emîn de li Stada Tahîr Elçî ya Amedê hatin hemberî hev. Bi deh hezaran alîgirên Amedsporê li stadê cihê xwe girtin. Beriya maç dest pê bike li stadê stranên Kurdî û Tirkî lêxistin û alîgiran li ber stranan li govend gerandin, li çepikan dan û dirûşm berz kirin.
Hasan Alî Kaldirim seqet bû
Amedspor bi destpêkirina maçê gelek pozîsyonên dîtin lê nekarî golê biavêje. Alîgiran di maçê de bêrawestan dirûşm berz kirin. Dema di maçê de deqîqe bû 21 alîgiran ronahiya telefonên xwe vêxistin û strana “Dîren Ha Diyarbekîr Dîren” gotin. Di deqîqeya 17emîn de lîstikvanê Amedsporê Hasan Alî Kaldirim seqet bû nekarî bilîze. Ji ber vê yekê Celal Hanalp kete şûna wî. Di beşa ewil a maçê de her du tîman jî nekarî golê biavêjin û beşa ewil a maçê 0 û 0 bi dawî bû.
Daniel Moreno bi asîsta Dia Saba gol avêt
Di beşa duyemîn a maçê de Amedsporê dîsa gelek pozîsyon dîtin. Alîgiran jî bênavber dirûşmên weke “Kesk, Sor Şampiyan Amedspor” berz kirin. Di maçê de lîstikvanên Amedsporê Zdravko Dîmîtrov, Cem Ustundag û Florent Hasanî derketin û şûna wan Dia Saba, Daniel Moreno û Adama Traore ketin maçê. Piştî vê guhertinê Daniel Moreno bi asîsta Dia Saba di deqîqeya 81an de gol avêt û Amedspor 1 û 0 kete pêşiya Manîsasporê. Piştî golê Amedsporê bibandortir lîst û gelek pozîsyon dîtin. Hakemê maçê di di deqîqeya 76an de qertê sor da lîstikvanê Manîsasporê Alenîs Vargas û ji lîstikê derxist.
Dû re di encama lîstika bibandor Amedsporê di deqîqeya 94an de goleke din avêt. Şûta ku lîstikvanê Amedsporê Daniel Moreno kişandî bi lîstikvanê Manîsasporê Ada Îbîk ket bû gol. Amedspor 2 û 0 bi serket û di rêya şampiyontiyê de 3 pûanên gelek girîng bidestxist.
Amedspor dê hefteya pêşiya me bi Hataysporê re bilîze
Amedspor bi vê encamê pûanên xwe kir 64 û bi maçeke zêde derket rêza duyemîn. Amedspor dê hefteya pêşiya me an ku di 22yê Adarê de li sehaya Hataysporê bi wê re bilîze. Heke Erokspor a niha maçeke wê kêm e sibê pûanan winda bike Amedspor dê di rêza duyemîn de bimîne.
