Parêzgarê Hesekê li gel şandeyeke NYyê, rêxistinên mirovî, nûnerên Rêveberiya Avê, Rêveberiya Kar û Barên Civakî, Heyva Sor a Sûriyeyê û Heyva Sor a Kurd, rewşa mirovî, şert û mercên kampan, rêbazên piştgiriya vegera koçberan û ji nû ve aktîfkirina stasyona Elok a avê gotûbêj kirin.
Li Hesekê bi beşdariya şandeyeke Neteweyên Yekbûyî (NY) û çend rêxistinên mirovî, li gel nûnerên Rêveberiya Avê, Rêveberiya Kar û Barên Civakî, her wiha Heyva Sor a Sûriyeyê û Heyva Sor a Kurd û parêzgarê Hesekê Nûredîn Ehmed, civîneke berfireh hat lidarxistin.
Di civînê de rewşa mirovî ya giştî ya herêmê, rewşa deverên ku ji ber lehiyên vê dawiyê zirar dîtiye, rewşa kampan û rêbazên piştgiriya vegera koçberan, hatin gotûbêjkirin. Her wiha rewşa stasyona Elok a avê hat nirxandin û çareseriyên ji bo ji nû ve aktîfkirina wê hatin pêşniyarkirin.
Parêzgarê Hesekê Nûredîn Ehmed bal kişand ser girîngiya xebatên hevbeş di navbera hemû aliyan de da ku pêdiviyên bingehîn werin peydakirin. Her wiha behsa girîngiya ji nû ve xebitandina stasyona Elok a avê û piştgiriya alîkariya kesên ku ji ber lehiyan zirar dîtiye, kir.
