Girtiyê nexweş Mehmet Edîp Taşar ê ku li nexweşxaneyê jiyana xwe ji dest da, li Êliihê hate veşartin.
Girtiyê nexweş Mehmet Edîp Taşar (70) ê ku ji 3yê Adarê ve li Nexweşxaneya Çam Sakûra li navçeya Başakşehîrê ya Stenbolê dihate tedawîkirin di 24ê Adarê de jiyana xwe ji dest da. Malbata Mehmet Edîp Taşar duh êvarê cenazeye wî ji morgê girtibû ber bi Êlihê ve bi ketibûn û li goristana taxa Tilmencê ya Êlihê hate veşartin. Di merasîma veşartina cenazeyê de rêveber û endamên DEM Partî, DBP, TUAY-DER, MEBYA-DER, DÎAY-DER, ÎHD, OHD, malbata Mehmet Edîp Taşar û gelek endamên rêxistinên sivîl li wir amade bûn. Di merasîmê de bênavber dirûşmeya “Şehîd namirin” hate berzkirin.
Hevserokê TAUY-DERê Hasan Arigtekîn di merasîma veşartina Mehmet Edîp Taşar de axivî û got: “Em hemû şehîdên Kurdistanê bi rêzdarî bi bîr tînin û bejna xwe li ber keda wan ditewînin. Ev şehîdê me jî weke wan şehîdan bi salan e di zindanan de têkoşiya û bi kedeke mezin li ber xwe da. Bi salan e rêhevalên me di zindanan de nexweş in û nayên tedawîkirin. Armanca dewletê ew ku hevalên me bêne tunekirin.”
Merasîma veşartina Mehmet Edîp Taşar bi xwendina duayan bi dawî bû û dê sibê li mala şînê serdan bêne kirin.
