DÎSK, KESK, TMMOB û TTBê bi daxuyaniyek hevpar diyar kirin ku dê di 1ê Gulanê li Qada Taksîmê pîroz bikin û bang li hemû karker û kedkaran kirin ku ji bo dad, aştî û kedê werin 1ê Gulanê û dengê xwe bikin yek.
Gelek sendîka, ode, partiyên siyasî û rêxistinên civakî xwe ji bo 1ê Gulanê Roja Karker û Kedkaran a Cîhanê amade dikin. Bi boneya 1ê Gulanê Konfederasyona Sendîkayên Kedkarên Cemaweriyê (KESK), Konfederasyona Sendîkayên Karkerên Şoreşger (DÎSK), Yekîtiya Bijîşkên Tirk (TTB) û Yekîtiya Odeyên Endezyar û Avahîsazan a Tirk (TMMOB) li avahiya DÎSKê ya li Taksîmê daxuyanî dan. Daxuyanî ji aliyê Seroka Giştiyê ya DÎSKê Arzu Çerkezoglu ve hate xwendin.
‘Operasyonên siyasî berdewam dikin’
Arzu Çerkezoglu diyar kir ku her ku diçe hêza danûstandina karkeran dikevê û wiha axivî: “Şîrket her ku diçe dewlemendtir dibin. Ji karkeran zêdetir bac tê standin û ev bac ji bo karkeran nayê bikaranîn. Jiyaneke mirovî tune ye. Her der tê talankirin. Divê pêdiwiya gel berî her tiştî were. Em dizanin ku tiştên ji me tê dizîn û ji bo sermay û lêçûna şer diçe. Li dijî van bertekên gel jî bi destê darazê tê tunekirin. Di vê pergalê de dad tune ye. Ev pergal naxwaze pirsgirêka Kurd bi rêya aştiyê çareser bike û şer pêş dixe. Li gel pêvajoya ku bi banga ‘Aştî û Civaka Demokratîk’ hatiye destpêkirin jî desthilatdar gav neavêje û operasyonên xwe yên siyasî dijwartir dike. Dixwaze tevahî muxalefetê bêdeng bike.”
‘Ji bo nan, ked, dad û aştiyê werin qadên 1ê Gulanê’
Arzu Çerkezoglu anî ziman ku ji bo aştiyê çi ji destê wan were ew ê bikin û got: “Ji bo wê em ê li her derê aştiyê diparêzin. Ne tenê li welatê me, hemû qadên 1ê Gulanê dê bibin cihê bilindkirina dengê aştiyê. Em xwedî vîn in, em ê vê pergalê biguherînin. Divê em yekîtiya xwe ava bikin. Hêza me ji yekîtiya me tê. Di 1ê Gulanê de dengê xwe bikin yek. Ji bo dad, aştî û kedê werin 1ê Gulanê. Li Stenbolê qada 1ê Gulanê Qada Taksîme ye. Me di 25ê Adarê ji bo 1ê Gulanê serlêdan kir û me daxwaza ya Qada Taksîmê anî ziman. Di vê 1ê Gulanê de ji bo nan, ked, dad û aştiyê em herkesî vedixwînin qadên 1ê Gulanê.”
Nûnerên sendîka û odeyên din jî bal kişandin ser girîngiya 1ê Gulanê û xwestin ku her kes îsal li qadan be. Piştî axaftinan daxuyanî bi dawî bû.
