Hevserokatiya Konseya Rêveber a KCKê bi daxuyaniyek nivîskî qurbaniyên komkujiya Enfalî bi bîr anî. KCKê diyar kir ku Enfal yek ji komkujiyên herî hovane, zaliman e û bi êş a dîroka mirovahiyê ye û wiha got: “Talûkeya komkujiyan nepediya ye û îro jî li ser gelê Kurd planên komkujiyê tên kirin.”
Hevserokatiya Konseya Rêveber a KCKê bi daxuyaniyekê qurbaniyên komkujiya Enfalê bibîr anî û ev komkujiî wekî ji komkujiyên herî hovane ên di dîroka mirovahiyê de pênase kir. Di daxuyaniyê de wiha hate gotin; ‘‘Di vê demê de ku di salvegera komkujiya Enfalê de em bi sed hezaran qurbaniyan bi bîr tînin, metirsiya komkujî û qirkirinê ya li ser gelê Kurd hîn jî dewam dike. Hîn jî hêzên înkarker û asîmîlasyonîst li dijî gelê me planên komkujî û qirkirinê dikin, bi vê armancê têkiliyê bi her hêzê re datînin.’’
‘Li dijî zexta komkujiyê emê têkoşînê mezin bikin’
Hevserokatiya Konseya Rêveber a KCKê di daxuyaniya xwe de ev peyam dan: “Em vê komkujiya hovane ya li derveyî mirovahiyê ku ji bo tunekirina bigiştî ya gelê me hate kirin, careke din bi tundî şermezar dikin. Hemû kesên di komkujiyên Enfalê de jiyana xwe ji dest dan bi rêzdarî bi bîr tînin. Di serî de gelê Başûrê Kurdistanê em êşa mezin a tevahiya gelê Kurdistanê ji kûrahî ve hîs dikin û biryardariya xwe destnîşan dikin ku ji bo rizgarkirina gelê xwe ji zexta komkujî û qirkirinan û misogerkirina azadiyê têkoşîna xwe hîn mezin bikin.”
‘Hêzên hegemonîk hêzkan komkujeran’
KCKê destnîşan kir ku ev qirkirina li dijî gelê Kurd hate kirin bêguman di wijdanê mirovahiyê de mehkûm bûye û bi vî rengî dewam kir: “Gelê me wijdanê mirovahiyê gelekî hêja dibîne û pê bawer e. Lê belê li gel ku van êrişan bi salan dewam kir û bi rengekî eşkere hatin kirin jî ne dewletan ne jî saziyên navneteweyî nerazîbûn nîşan dan. Di rewşeke welê de ku gelê me di bin komkujiyê de dinaliya, dewletan siyaseta xwa ya berjewendiyan meşandin û têkiliya xwe yên bi rejîma Saddam ê zalim re dewam kirin. Weke li Dêrsim û Geliyê Zîlan, di komkujiyên Enfalê de jî saziyên navneteweyî yên di bin bandora dewlet û hêzên hegemonîk de tevdigerin bêdeng man û hêz dan komkujeran. Bi taybetî hêzên hegemonîk bi polîtîkayên xwe yên li Rojhilata Navîn re bûn sedema komkujî û qirkirinan. Di encama vê polîtîkayê de gelên din ên li Rojhilata Navîn jî li komkujî û qirkirinê rast hatin.”
‘Metirsiya komkujiyê berdewam dike’
KCKê da zanîn ku di vê salvegera komkujiya Enfalê de bi sed hezaran qurbaniyan bi bîr tînin, metirsiya komkujî û qirkirinê ya li ser gelê Kurd hîn jî dewam dike û wiha pêde çû: “Hîn jî hêzên înkarker û asîmîlasyonîstên li dijî gelê me planên komkujî û qirkirinê dikin, bi vê armancê têkiliyê bi her hêzê re datînin. Gelê me herî dawî li Rojava ev metirsî dît û bi ruhê yekîtiya neteweyî û welatparêziyê rabû saer piyan, li kêleka şervan û gelê Rojava sekinî û nehişt ku komkujiyeke din rû bide. Ev helwesta gelê me raxist pêş çavan bê yekîtiya neteweyî ya demokratîk çiqasî pêwîstî û girîng e. Divê hêzên welatparêz ên Kurdistanî vê bibînin û ji bo pêkanîna yekîtiya neteweyî ya demokratîk hewl bidin.”
KCKê di dawiya daxuyaniya xwe de ev bang kir: “Bi vê wesîleyê em bang li wan hêzan dikin ên ku bi mejiyê berê tevdigerin ku dest ji vê israra xwe berdin û bang li dewlet û saziyên navneteweyî jî dikin ku li hemberî êrişên li ser gelê me bêdeng nemînin, dest ji siyaseta xwe ya berjewendiyan berdin û nebin zemîna komkujiyan. Em careke din her kesên di Enfalê de jiyana xwe ji dest dan bi bîr tînin û bi rêzdarî bejna xwe li ber bîranîna wan ditewînin.”
