Navenda Nûçeyan – Şaxên Egîtîm Senê li dijî êrişa li ser lîseyê ya Siwêregê rojek dest ji kar berdan û êriş protesto kir. Di daxuyaniyên hatin dayîn de hat xwestin ku berpirsiyar hesab bidin raya giştî û Wezîrê Perwerdehiyê Yusuf Tekîn îstîfa bike.
Duh li navçeya Siwêregê ya Rihayê kesek êrişî Lîseya Pîşeyî û Teknîkî ya Anadoluyê ya Ahmet Koyuncu kiribû. Di encama erişê de 10 xwendekar, 4 mamoste, karkerek kantînê û polîsek birîndar bûbûn.
Şaxên Egîtîm Senê yên bajarên Bakurê Kurdistanê û Tirkiyeyê li dijî êrişê rojek dest ji kar berdan û êriş protesto kirin. Gelek bajaran endamên Egîtîm Senê çalakî li dar xistin.
ENQERE
Sendîkaya Kedkarên Perwerdehî û Zanistê (Egîtîm Sen) û sendîkayên perwerdehiyê li dijî êrişên ser dibistanên navçeya Sêwereg a Rihayê û Mereşê li ber Wezareta Perwerdehiyê ya navçeya Çankaya ya Enqereyê dest bi “Nobeda Jiyanê” kirin. Endam û nûnerên sendîkayan pankart û dovîzên di destê wan de li deriyê hewşa Wezaretê daliqandin û li wir dest bi rûniştinê kirin.
Sekreterê Giştî yê Egîtîm-Senê Zulkuf Guneş bi lêv kir ku li navçeya Sêweregê di encama êrişa bi çek li dibistanê de mamoste û şagirt jî di nav de 16 welatî birîndar bûn û wiha got: “Dema me li vir li dijî vê yekê daxuyanî da agahiyeke komkujiyê jî li Mereşê hat. Di êrişa dibistana li Mereşê de heta niha 6 şagirt û mamosteyan jiyana xwe ji dest dane û nêzî 40 kes jî birîndar bûne. Weke Egîtîm-Sen me jî beriya berdana kar a rojeke da bû. Lê li ser vê bûyera em biryara xwe ya berdana kar 2 rojan dirêj dikin û di 16 û 17ê Nîsanê de li ber Wezareta Perwerdehiyê dest bi nobedê kir. Em li vir bang li hemû endam û welatiyan dikin ku xwedî li nobeda me derkevin.”
Endam û nûnerên sendîkayan ku îro piştî daxuyaniyê dest bi nobedê kirin dê heta derengiya şevê li ber wezaretê bin û sibê û du sibe jî çalakiya xwe bidomînin.
STENBOL
Li Stenbolê endam û rêveberên Egîtîm Senê li pêşiya Rawestgeha Tramvayê ya Beyazitê kom bûn û heta Midûriyeta Bajêr ya Perwerdehiyê meşiyan. Berî ku girse bigîhije pêşiya midûriyetê polîsan bend danî pêşiya girseyê, lê girseyê li ber xwe da û polîs neçar man ku pêşiya girseyê vekin. Endam û rêveberên Egîtîm Senê, nûnerên sendîkayan û gelek mamoste tev li çalakiyê bûn.
Piştî meşê li vir daxuyanî hate dayîn. Daxuyanî ji aliyê Serokê Şaxa Egîtîm Senê ya Hejmara 3yemîn a Stenbolê Huseyîn Tosun ve hat xwendin.
Huseyîn Tosun anî ziman ku îro dibistan bûne cihê tundiyê û wiha got: “Berpirsiyarê tundiyan polîtîkayên desthilatê ye. Ji bo pêşiya tundiyê bê girtin divê pergala perwerdehiyê ji nûve were înşakirin. Em wekî Egîtîm Senê banga hesapdayînê dikin. Têkoşîna me ya perwerdehiya zimanê zikmakî û demokratîk dê bidome.”
Piştî axaftinê çalakî bi dawî bû.
WAN
Şaxa Egîtîm Senê ya Wanê derbarê êrişa li Siwêregê ya li ser dibistanekê ku 16 kes birîndar bûn, li ber Şekerbankê heta Qada Bajêr meşek li dar xist. Di meşê de pankarta “Di perwerdehiyê de ji tundiyê re bibêje na” û “Ji tundiya li ser mamosteyan re na” hat vekirin û di dirûşmên “Dijminê mamosteyan Yusuf Tekin îstifa” û “Bijî berxwedana kedkaran” hatin berzkirin. Gelek welatî û mamoste tev li meşê bûn. Piştî meşê li Qada Bajêr daxuyanî hat dayîn.
Daxuyanî ji aliyê Hevseroka Şaxa Egîtîm Senê Fîdan Demîr Bozkurt ve hat xwendin. Fidan Demîr Bozkûrt di daxuyaniyê de bal kişand ser zêdebûna bûyerên tundiyê û xwest kes û saziyên nikarin xwendekar û mamosteyan biparêzin divê hesab bidin raya giştî.
AMED
Şaxên Egîtîm Senê yên Hejmara 1 û 2yan ên Amedê li ber avahiya Midûriyeta Perwerdehiyê ya Bajêr û Şaxa Egîtîm Senê ya Hejmara 3yan jî li navçeya Erxeniyê ya Amedê daxuyanî da çapemeniyê. Hevşaredar, endam û rêveberên saziyên sivîl di nav de gelek kes tev li daxuyaniyê bûn.
Metna daxuyaniya hevpar Sekretera Şaxa Egîtîm Senê ya Hejmara 1an a Amedê Arzû Koç xwend. Li Erxeniyê jî metna daxuyaniyê Hevserokê Şaxa Egîtîm Senê ya Hejmara 3yan a Amedê Serdar Kaya xwend.
ENQERE
Navenda Egitîm-Sen jî di nav de gelek sendîkayên perwerdehiyê li dijî êrişên li ser dibistana li navçeya Siwêreg û dibistana li Mereşê li ber Wezareta Perwerdehiyê dest bi “Nobeda Jiyanê” kirin û bang li Wezîrê Perwerdehiyê Yusuf Tekîn kirin ku îstîfa bike.
Navenda Giştî ya Sendikaya Kedkarên Perwerdehî û Zanîstê (Egitîm-Sen) li dijî êrişa li ser dibistaneke navçeya Sêwereg a Rihayê û dibistanek l Mereşê li ber Wezareta Perwerdehiyê daxuyanî da. Di heman wexte de gelek sendîkayên perwerdehiyê jî bi pankart û filamayên xwe hatin ber wezaretê û bertek nîşan dan. Endam û nûnerên sendîkayan xwestin bimeşin ber avahiya Wezareta Perwerdehiyê lê ji aliyê polîsan ve hatin astengkirin. Girseyê bertek nîşanî dorpêça polîsan dan û bi berzkirina dirûşmeyên, “Yusuf Tekîn îstîfa bike”, “Em naxwazin di dibistanan de werin kuştin” û “Barîkatan vekin” demekê dirêj çalakiya xwe domandin.
Endam û nûnerên sendîkayan li ser astengiya polîsan xwestin dorpêçê hilweşînin û li ser vê yekê di navbera polis û endam û nûnerên sendîkayan de gengaşî derket. Li ser israra girseyê polis neçar man xwe rakin û girseyê li ber Wezareta Perwerdehiyê daxuyanî da.
‘Bila Yusuf Tekîn îstîfa bike’
Sekreterê Giştî yê Egîtîm Senê Zulkuf Guneş li vir axivî û anî ziman ku di dibistanan de ewlehiya mamoste û şagirtan nemaye û wiha got: “Wezareta Perwerdehiyê zarokan û mamosteyan naparêze. Bi pergala perwerdehiya dijberbûnê dibe sedema êrişên bi vî rengî. Li dijî vê pergalê divê pergaleke perwerdehiyê ya aştiyane û dijberî û rekabetê li ser zarokan ferz neke bê damezrandin. Her tişt bi perwerdehiyê dest pê dike. Aştiyeke civakî jî bi perwerdehiyê pêkan e. Em li vir bang li Wezîrê Perwerdehiyê Yusuf Tekîn ku berpirsê van bûyeran e îstîfa bike.”
Gelek nûnerên sendîkayên perwerdehiyê jî li vir axivîn û bertek nîşanî êrişên li ser dibistanan dan û xwestin Yusuf Tekin îstîfa bike. Her wiha nûnerên sendîkayan xwestin di dibistanan de ewlekar bên peywîrdarkirin û gotin heta daxwazên wan pêk were ew dê çalakiya xwe bidomînin.
Nobet hate destpêkirin
Di kêliyên daxuyanî dihat dayîn de agahiyek din a êrişa li dibistanekê ji Mereşê hat. Li ser vê yekê girseyê bertek nûşan da û li ber wezaretê dest bi “Nobeda jiyanê” kirin. Çalakiya endam û nûnerên sendîkayan li ber Wezareta Perwerdehiyê berdewam dike.
ÎZMÎR
Li Îzmîrê jî şaxên Îzmîrê yên Egîtîm Sen, Egîtîm Îş, Hurriyetçî Egîtîm Sen, Anadolu Egîtîm Sen, Egîtîmîn Gucu Sen, TEÇ Sen û Sendikaya Mamosteyên Sektora Taybet li ber Avahiya Bajêr a SGK ya Konakê civiyan û ber bi Midûriyeta Perwerdeya Neteweyî ya Bajêr a Îzmîrê ve meşiyan.
Di meşa ku bi hezaran kedkarên perwerdeyê beşdar bûn de, dovîzên bi nivîsa “Xwîn bi pêştemalan ket” hatin hilgirtin û ji bo temsîlkirina êrîşê pêştemalên bi xwîn hatin lixwekirin. Kedkarên perwerdeyê çelenga reş danîn ber deriyê midûriyetê û li wir demekê çalakiya rûniştinê li dar xistin.
Daxuyaniya hevpar a çapemeniyê; li ser navê Egîtîn Îş Ozgur Şen, li ser navê Egîtîm Senê Hamdin Çalik, li ser navê Hurriyeçî Egîtîm Senê Adnan Sarisayin li ser navê Anadolu Egîtîm Sendikasi Mehmet Kaya, li ser navê Egîtîmîn Gucu Sendikasi Ali Kilinç li ser navê TEÇ Senê Rakip Kurtar û li ser navê Sendikaya Mamosteyên Sektora Taybet Rabîa Atbaş xwendin.
