Wan – Şaxa ÎHDê ya Wanê têkildarî çalakiya greva birçîbûnê ya girtî Tahsîn Sagaltici, Gurkan Turkglu û Huseyîn Ozen ên bi daxwaza girtina girtîgehên wekî ‘bîrê’ dane destpêkirin, daxuyaniyek da û xwest daxwazên girtiyan demildest bê bicîhanîn.
Şaxa Komeleya Mafê Mirovan (ÎHD) a Wanê, têkildarî çalakiya greva birçîbûnê ya girtî Tahsîn Sagaltici, Gurkan Turkglu û Huseyîn Ozen ên di Girtîgeha Ewlehiya Bilind a Antalyayê de tên ragirtin, bi dirûşma “Tecrîd sûcekî mafê mirovahiyê ye. Bila girtîgehên mîna bîrê bên girtin” daxuyanî da. Daxuyaniya li pêşiya deriyê ÎHDê ya navçeya Rêya Armûşê hat dayîn, hevseroka komeleyê Ayten Kiranê xwend.
Ayten Kiranê da anî ziman ku di girtîgehên ewlehiya bilind û girtîgehên tîpa Y û S de sepanên tecrîda giran zêdetir bûne û got: “Ev zindan bi qestî ji navendên bajaran dûr hatine avakirin û bi vî avayî girtiyan tecrîd dikin. Girtî Tahsîn Sagaltici, Gurkan Turkoglû û Huseyîn Ozmen bi daxwaza girtinê ya van girtîgehan û guhertina cihên xwe, di greva birçîbûnê ya bêdawî de ne. Giraniya Tahsîn Sagaltici ê ev 266 roj in di greva birçîbûnê de ye daketiye 40 kîloyan. Di zimanê wî de birîn derketine û pirsgirêkên ji bîrkirinê dijî.”
Di berdewama daxuyaniyê de Ayten Kiranê xwest daxwazên girtiyan bên pêkanîn û wiha got: “Divê ji girtî Tahsîn Sagaltici, Gurkan Turkoglû û Huseyîn Ozmen kesên refaqetê dikin demildest bên pejirandin, malbat û parêzer der barê tenduristiya wan de zûtir bên agahdar kirin û bijîşkên serbixwe bila rewşa wan binirxînin. Divê tecrîd were bidawîkirin û daxwazên wan bên qebûlkirin. Ji bo mafên mirovan divê bi rêxistinên civakî re hevkarî were kirin. Divê daxwazên girtiyên di greva birçîbûnê de ne bên guhdarîkirin û daxwazên wan bên bicîhanîn.”
