Rêxistinên ekolojiyê li Qada Qesaban a Çîgliya Îzmîrê li hev civiyan û li dijî projeyên talankirina xwezayê yên li Gimgimê pêk tên dengê xwe bilind kirin. Di daxuyaniyê de destnîşankirin ku destwerdanên li herêmê tên kirin, qirkirinên ekolojîk in.
Platforma Ekolojiyê ya Gimgimê û Platforma Parastina Geliyê Periyê, li dijî gefên li ser qadên jiyanê daxuyaniyeke çapemeniyê dan. Di çalakiyê de dirûşma “Dest nede hewa, av û axa min” û “Gimgim ne bi tenê ye” hatin berzkirin. Parlamentera DEM Partiyê ya Îzmîrê Burcu Gul Çubuk jî beşdarî daxuyaniyê bû û piştgirî da çalakgeran. Metna daxuyaniyê ji aliyê endama Platforma Ekolojiyê ya Gimgimê, Eylem Koşar Bagic ve hat xwendin.
‘Em vê ferzkirina bêhiquqî qebûl nakin’
Eylem Koşar Bagic diyar kir ku ev hewldan ne tenê veberhênanekî enerjiyê ye û got: “Ev hewildana ku em pê re rû bi rû ne; rasterast destwerdaneke li ser ax û mîrasa me ya çandî ye. Em wekî zarokên wê axê û parêzvanên jiyanê; vê ferzkirina bêhiquqî ya li ser av, mêrg û çavkaniyên me yên debarê, bi tu awayî qebûl nakin. Hêla me jiyan e, têkoşîna me ji bo domandina vê jiyanê ye. Em bi biryar in ku vê emaneta ku me ji bav û kalên xwe girtiye, ne wekî çolekê, wekî welatekî ku jiyan jê diherike dewrî zarokên xwe bikin.”
‘JES korbûna zanistî ye’
Eylem Koşar Bagic bal kişand ser rîskên erdhejê û projeyên Santralên Jeotermal (JES) û wiha berdewam kir: “Herêma me li ser xeta şikesteka erdhejê ya herî taloke de cih digire. Di navenda erdhejê ya pileya yekemîn de çêkirina JESan, korbûna zanistî ye. Metalên giran û gazên jehrî yên ku tevli avên bin erdê dibin, tenduristiya gel, çandinî û sewalkariyê diqedînin. Ev kîmyasal ji bo çavkaniyên me yên avê rîskeke mezin a qirêjbûnê ne ku venegere.”
Banga tevlîbûna mitîngên Gimgim û Kêrevinê
Eylem Koşar Bagic di dawiya daxuyaniyê de banga tevlîbûna mitîngên ekolojiyê kir û wiha got: “Bi vê biryardariyê; em di 23ê Nîsanê de ji Îzmîrê dikevin rê. Em bang li hemû raya giştî dikin ku di 24ê Nîsanê de li Gimgimê û di 25ê Nîsanê li Kêrevinê beşdarî mitîngên me bibin û dengê me bilind bikin.”
‘Gelê dê li dijî zilm û talanê têbikoşe’
Piştî daxuyaniyê Parlamentera DEM Partiyê Burcugul Çubuk jî axivî û got: “Em dizanin ev gelê ku heta îro li dijî bi dehan talan û zilmê li ber xwe daye, dê îro jî li dijî van êrîşan bi yekitiyê têbikoşe.”
Daxuyaniya çapemeniyê piştî berzkirina dirûşman bi dawî bû.
