Wan – Hevberdevka Înîsiyatîfa Yekîtiya Demokratîk Gulcan Kaçmaz Sayyîgît derbarê xebatên Înîsiyatîfa Yekîtiya Demokratîk de axivî û diyar kir ku li dijî polîtîkayên qirkirinê û êrişên li ser her çar parçeyên Kurdistanê, yekane rê yekîtiya neteweyî ye û wiha bang li partiyên siyasî kir: “Gel li kolanan dibêje ‘em yek in’, êdî siyaset nikare guhê xwe li vê daxwazê bigire.”
Înîsiyatîfa Yekîtiya Demokratîk di 11ê Gulana 2025an de li Amedê bi deklarasyonekê hatibû ragihandin ku ew ê ji bo yekîtiya neteweyî ya gelê Kurd xebatên berfireh bimeşîne, qonaxeke nû ya xebatên xwe parve kir. Hevberdevka Înîsiyatîfê Gulcan Kaçmaz Sayyîgît derbarê pêvajoya piştî deklarasyonê, bandora bangawaziya Rêberê Gelê Kurd Abdullah Ocalan û astengiyên li pêşiya yekîtiya Kurdan ji ajansa me (AW) re nirxand.
‘Piştî deklarasyonê xebat xurttir bûn’
Gulcan Kaçmaz Sayyîgît diyar kir ku wan çarçoveya xebatên xwe zelal kiriye û got: “Me di nava rêziknameya xwe de jî diyar kiriye, em pirsgirêka Kurd wekî pirsgirêka statû, demokrasî û azadiyê dibînin. Piştî bangawaziya birêz Abdullah Ocalan, xebatên me hê xurttir bûn. Ew bangawazî ne tenê ji bo gelê Kurd, ji bo gelê Kurdistanê yê her çar parçeyan, Rojhilata Navîn û hemû cîhanê bû nexşerêyeke pir bandor û atmosfereke erênî derxist holê.”
‘Ya dilê me dêşîne, berjewendiyên eşîrî û siyasî ne’
Gulcan Kaçmaz Sayyîgît di axaftina xwe de bi rexneyî nêzî parçebûna siyaseta Kurd bû û anî ziman ku berjewendiyên teng rê li ber destkeftiyên neteweyî digirin. Gulcan Kaçmaz Sayyîgît wiha pê de çû: “Tiştê herî zêde dilê me dêşîne ev e, gelê Kurd carinan berjewendiyên xwe yên siyasî, yên eşîrtî û yên şexsî dixe pêşiya berjewendiyên neteweyî. Ji ber vê yekê me heta niha nekariye yekîtiya xwe ava bikin. Heke îro yekîtiya me hebûna, belkî me behsa êrişên li ser Rojava nedikir. Îro li Rojhilat heman tişt heye, li Başûr heman tişt û mixabin li her derê li dijî Kurdan zilm tê meşandin. Heke yekîtî ava biba, kesî nediwêrî bi vî rengî bi hovane êrişî ax û mafên gelê Kurd bike.”
‘Gel amade ye, siyaset li paş maye’
Gulcan Kaçmaz Sayyîgît bal kişand ser serhildan û bertekên gel ên li dijî êrişên li ser Rojava û wiha berdewam kir: “Dema êriş birin ser Rojava, me dît ku gelê me ji bo yekîtiyê amade ye. Li kolanan tenê dengekî bilind dibû, digotin ‘Yek e, yek e, gelê Kurd yek e’. Ev peyamek bû ji bo hemû siyasetmedar û partiyên Kurdistanî. Gel li kolanan dibêje ‘em yek in’, êdî siyaset nikare guhê xwe li vê daxwazê bigire. Gel dibêje em amade ne, lê hişmendiya siyasî û partîtiyê rê li ber vê yekê digire. Divê partî êdî berjewendiyên xwe nekin hincet. Em nabêjin bila fikir û ramanên xwe nebin, lê divê li ser xetên sor bên cem hev. Ew xetên sor jî mafên gelê Kurd, ziman, çand û hunera Kurdî ye.”
Serhildana li Rojhilat û krîza rejîmê
Gulcan Kaçmaz Sayyîgît bal kişand ser taybetmendiya erdnîgarî û qedîm a Rojhilatê Kurdistanê jî û ev yek li axaftina xwe zêde kir: “Li Rojhilat gelê me yê qedîm di bin desthilatdariya rejîmeke yekperest de dijî. Mafên wan têne binpêkirin û krîzên aborî yên mezin hene. Lê îro li wê derê rihekî cuda, rihekî serhildanê derketiye holê. Gelê wê derê edalet, hiqûq û wekheviyê dixwaze. Divê em li gorî daxwaza dewletan û hêzên hegemon na, li gorî daxwaza gelê xwe piştgiriyê bidin vê berxwedanê.”
‘Ji Bakur heta Anatolyayê, Em ê xwe bigihînin her Kurdekî’
Gulcan Kaçmaz Sayyîgît di dawiya axaftina xwe de diyar kir ku xebatên wan tenê bi Bakurê Kurdistanê re sînordar nîn e û armanca wan a sereke avakirina “Kongreya Neteweyî” ye. Gulcan Kaçmaz Sayyîgît axaftina xwe wiha bi dawî kir: “Kurdistanî tenê li Bakur nîn in. Îro hejmara herî zêde ya Kurdan li Stenbolê ye, Bursa, Tekîrdag û li her derê Anatolyayê heye. Weke Înîsiyatîfa Yekîtiya Demokratîk, em dixwazin xwe bigihînin her Kurdekî û her Kurdistaniyekî. Em dixwazin ev xebat bibe bingeha kongreya neteweyî û em bi hev re di vê rêyê de bimeşin.”
