Di xwarina Komeleya Nûçegihanên Qesra Spî ya li Washingtonê de, ji ber êrişeke çekdarî ya li derve panîk çêbû. Di dema bûyerê de ku Donald Trump jî li salonê bû, ajanekî servîsa veşartî birîndar bû û gumanbarek hat binçavkirin.
Xwarina Komeleya Nûçegihanên Qesra Spî ya li paytexta DYAyê Washingtonê, ji ber dengê çekan nîvco ma. Di bernameya ku nêzî 2 hezar û 600 kes beşdar bibûn de, Donald Trump û hevjîna wî jî amade bûn.
Trump birin cihekî ewle
Li ser dengê çekan ku ji derve hat bihîstin, mêvanan xwe di bin maseyan de veşartin. Trump û hevjîna wî ji aliyê servîsa veşartî ve bi lez bo herêmeke ewle hatin veguhestin. Salon bi temamî hat valakirin û rayedarên payebilind jî ji cihê bûyerê hatin derxistin.
Ajanek birîndar e, gumanbar hat girtin
Rayedaran daxuyandin ku di bûyerê de gumanbarek hatiye binçavkirin. Hat ragihandin ku ajanekî servîsa veşartî bi çekê birîndar bûye û wî rakirine nexweşxaneyê. Tîmên polîsan herêm xistin bin çembera ewlehiyê û helîkopteran jî li navenda bajêr dest bi firînên dewriyeyê kirin.
Bi polîsan re kete şer
Şefê polîsan ê demkî Jeffrey Carroll da zanîn ku bi gumanbar re tiving, demançe û kêr hebûn û piştî ku xwestiye bi zorê benda ewlehiyê derbas bike, bi hêzên ewlehiyê re ketiye pevçûnê.
Armanca wî rêveberiya Trump bû
Li gorî daxuyaniya rayedaran, gumanbarê 30 salî wê roja Duşemê derkeve pêşiya dadgehê. Di nûçeyên çapemeniya DYAyê de hat diyarkirin ku gumanbar li xwe mikur hatiye ku armanca wî rayedarên rêveberiya Trump bûne.
Trump: Têkiliya êrişê bi şerê Îranê re nîne
Piştî bûyerê Trump daxuyaniyek da û diyar kir ku ew nafikire ev êriş bi rageşiya bi Îranê re têkildar be. Trump wiha axivî: “Ev yek wê nebe sedem ku em dev ji armanca xwe ya qezenckirina şerê li Îranê berdin.”
