Rêxistina DEM Partiyê ya Kadikoyê bi boneya 1ê Gulanê li Parka Yogurtcuyê şahiya karkeran li dar xist.
Şahî û çalakiyên DEM Partî yên ji bo 1ê Gulanê Roja Karkerên Cîhanê bênavber didomin. Rêxistina DEM Partiyê ya navçeya Kadikoyê li Parka Yogurtcuyê şahiyeke li dar xist. Hevserokê DEM Partiyê ya Stenbolê Çinar Altan, Parlamenterê DEM Partiyê ya Rihayê Ferît Şenyaşar, endam û rêveberên DEM Partiyê yên navçeyên Stenbolê, serok û rêveberên sendîkayan û gelek kes tev li şahiyê bûn. Şahî bi gerandina govendê dest pê kir.
‘Em dixwazin li ser vê axê aştiyê saz bikin’
Hevserokê DEM Partiyê yê Stenbolê Çinar Altan di şahiyê de axivî. Çinar Altan di serî de silav ji karkerên madenê ku li Enqereyê nobed digirin re şand û got: “Divê em wateya 1ê Gulanê bizanin. Di dîrokê de 1ê Gulanê çawa hat pîrozkirin ev girîng e. Herdem gotina ‘dewlet ya kî ye?’ tê pirsîn. Kengê ku li cihekî têkoşîn heye dewlet li wir e û li dijî wê ye. Ev têkoşîn dê herdem berdewam bike. Ji bo me jî tenê rêya berxwedanê pêşiya me ye. Em dixwazin li ser vê axê aştiyê saz bikin. Em ê bi dirûşmeya ‘nan û azadî’ diçin 1ê Gulanê. Lê divê em bizanin çîn ne wekhev bin azadî jî pêk nayê.”
‘Em ê mil bi mil herin 1ê Gulanê’
Ferît Şenyaşar diyar kir ku ew bi dirûşmeya ked, edalet û aştiyê diçin 1ê Gulanê û wiha axivî: “Girtîgeh tijî ne. Heke behsa aştiyê dikin, divê girtiyên siyasî werin berdan. Em ê mil bi mil herin 1ê Gulanê.”
Paşê kursiya karkeran hate lidarxistin. Karker yek bi yek derketin li ser dikê û li ser girîngtiya têkoşîna axivîn.
Piştî axaftina Koma Sideng Kayy-Der derket ser dikê û stranên xwe gotin. Şahî bi gerandina govendê bi dawî bû.
