Amed – Platforma Piştgirî û Parastina Bajêr a Amedê, bertek nîşanî astengkirina konvoya duyemîn a alîkariyên ji bo Kobanê da û bang kir ku deriyê sînor ê Murşîtpinarê demildest were vekirin.
Platforma Piştgirî û Parastina Bajêr a Amedê, li avahiya Odeya Pîşesazî û Bazirganiyê ya Amedê (DTSO) der barê astengkirina konvoya duyemîn a alîkariyê ya ji bo Kobanê daxuyaniyeke çapemeniyê li dar xist. Pêkhateyên platformê tev li daxuyaniyê bûn. Li ser navê platformê metna daxuyaniyê ya bi Tirkî Serdar Keskîn xwend.
‘Tevî astengiyan jî konvoya yekem gihîşt’
Serdar Keskîn bi bîr xist ku wan di 28ê Çileya 2026an de ji bo alîkariya mirovî kampanyayek dabû destpêkirin û wiha got: “Di 30ê Çileyê de 25 TIRên alîkariyê hatin amadekirin. Ji ber ku deriyê Murşîtpinarê nehate vekirin, me alîkarî di ser deriyê Çobanbeyê re şandin. Tevî hemû astengiyan jî, alîkariyên me di 10ê Sibatê de gihiştin Kobanê û li kesên hewcedar hatin belavkirin.”
‘Alîkariyên me di depoyên AFADê de têne sekinandin’
Di berdewama axaftina xwe de Serdar Keskîn bal kişand ser konvoya duyemîn a ku di 18ê Nîsana 2026an de ketiye rê û diyar kir ku Hikûmeta Sûriyeyê ya Demkî destûr nedaye ku alîkarî derbasî Kobanê bibin. Serdar Keskîn wiha pê de çû: “TIRên alîkariyê hê jî li deriyê sînor, di depoyên AFADê de têne sekinandin. Ev helwest ne tenê gelê Kobanê, pêşeroja hevpar a gelên herêmê jî tehdît dike. Astengkirina alîkariya mirovî binpêkirina mafê herî bingehîn a jiyanê ye.”
Banga li saziyên navneteweyî
Serdar Keskîn di dawiya axaftina xwe de bang li Neteweyên Yekbûyî (NY) û Yekîtiya Ewropayê (YE) kir da ku ji bo gihandina alîkariyên mirovî bikevin nava tevgerê û got: “Ji bo gihandina lezgîn û ewle, divê deriyê Murşîtpinarê ku riya herî kurt e were vekirin. Em spasiya gel, sazî û rêveberiyên herêmî yên ku piştgirî dan kampanyayê dikin û em ê heta dawiyê li cem gelê Kobanê bin.”
