Hevşaredarên Sêrtê Sofya Alagaş û Mehmet Kaysî biryara tayînkirina qeyûm weke “zilmê” pênase kirin û gotin: “Em biryarê danîna qeyûm nas nakin û em ê bi paş ve gavê neavêjin.”
Piştî ku duh dadgehê, 6 sal û 3 meh cezayê hepsê li Hevşaredara Sêrtê Sofya Alagaş birî, vê sibehê li ser fermana Wezareta Karên Navxwe waliyê Sêrtê Kemal Kizilkaya wek qeyûm tayînî Şaredariya Sêrtê hat kirin.
Hevşaredarên Sêrtê Sofya Alagaş û Mehmet Kaysî têkildarî tayînkirina qeyûm ji nûçegihanên Ajansa Mezopotamyayê (MA) Fethî Balaman û Heval Onkol re axivîn.
Alagaş: Qeyûm faşîzm e’
Sofya Alagaş diyar kir ku ji bo tayînkirina qeyûm ceza li wê hatiye birîn û wiha got: “Biryar jizûve hatiye dayin. Di demên dawî de polîsên sivîl em dişopandin. Jixwe eşkere bû ku dê qeyûm tayîn bikin, tenê teblîx kirin. Em vê biryarê nas nakin. Me biryara hatiye teblîxkirin jî çirand. Tişa em niha dijîn, faşîzm e. Sindoqê danin, namzet ji pêvajoyeke qanûnî re derbas dibin, namzetiya wan tê qebûlkirin. Piştre yan lêpirsînê vedikin an jî dozên heyî bilezûbez biencam dikin. Ev tê çi wateyê, tê wê wateyê ku tu gel, welêt û qanûnan dixapînî. Weke ku demokrasî hebe tevdigerin lê tune ye.”
Sofya Alagaş di berdewamiya axaftina xwe de ev yek anî ziman: “Desthilatê derdora 7-8 hezar hilbijêr veguhest vê derê. Tevî vê jî gelê Sêrtê ev polîtîka qebûl nekir û ev bi eşkereyî nîşan da. Lê îro qeyûm tayînî ser netew, ziman û çandan kirin. Ev bajar bajarekî pirrziman û pirçandî ye. Gelo dê çi bersivê bidin gelê bajar? Ya ku kirin, desteserkirin e. Êrişeke li dijî jinan, gelan û îradeyê ye. Ev 3 serdemin zilmê li gelê Sêrtê dikin. Gelê ku heta demekî kin berê jî bi rehetî dihat şaredariyê û derdê xwe vedigot, niha pêşiya wan bi bariyerên polîsan hatiye girtin.”
Kaysi: Em ê bi paş ve gavê neavêjin’
Hevşaredarê Sêrtê Mehmet Kaysî jî bertek nîşanî tayînkirina qeyûm da û wiha got: “Cezayê hatiye dayin hiqûqî nîne. Heta serê sibehê me li şaredariyê nobet digirt. Her çar aliyên me dorpêç kirin û ji şaredariyê derxistin. Ew çi dikin bila bikin em ê paşvegavê neavêjin. Ji bo xespkirina îradeya gel 8 hezar hilbijêr ji derve anîn. Lê tevî vê jî em bi 9 hezar dengan zêdetir bi ser ketin. Lê dîsa jî tehemûl nekirin.”
Kaysî banga “xwedî li şaredarî û îradeya xwe derkevin” kir û axaftina xwe wiha bi dawî kir: “Qeyûm, talan û xesp e. Bû 10 meh em li vir bûn. Dema em hatin şaredarî wêran kiribûn. Armanca wan xizmet nîne. Me di nava 10 mehan de hinek komî ser hev kir. Tu xêra wan ji bo vî gelî nîne. Gelê Sêrtê bi vê dizane û qebûl nake. Ew îradeya me nas nakin û em jî biryarên wan nas nakin.”
