Serokê Giştî yê CHPê Ozgur Ozel, têkildarî Forûma Aştî û Azadiya Civakî ya ku li Amedê tê lidarxistin peyamek şand û destnîşan kir ku ew ji bo aştiyeke mayînde di nava hewldaneke zêde de ne û got: “Ji bo vê yekê hewcedariya Kurd bi Tirk, hewcedariya Tirk bi Kurd heye.”
Serokê Giştî yê Partiya Gel a Komarê (CHP) Ozgur Ozel jî ji bo vekirina Forûma Aştî û Azadiya Civakî ya ku bi mazûvantiya Şaredariya Bajarê Mezin a Amedê tê lidarxistin peyamek şand. Ozel di peyama xwe de bal kişand ser êrişên siyasî yên li ser partiya wan û diyar kir ku ew vê ezmûnê bi rêbaza berxwedana demokratîk didin û dê bidomînin. Ozgur Ozel anî ziman ku dema gava ew mafê xwe diparêzin, dê li hemberî neheqiya li ser kesên din jî bêdeng nemînin.
‘Em ji bo aştiyeke mayînde di nava hewldaneke zêde de ne’
Ozgur Ozel destnîşan kir ku ji bo pêvajoyê veguherînin aştiyeke mayînde ketine nava hewldaneke zêde. Ozgur Ozel anî ziman ku ji bo desthilata siyasî vê pêvajoya dîrokî qurbanên hesabên xwe yên siyasî nekin hesasiyeta xwe diparêzin.
‘Ji bo aştiyeke mayînde em ê berpirsyartiyê bigirin ser xwe’
Ozgur Ozel di peyama xwe de bal kişand ser çareseriya pirsgirêka Kurd û wiha got: “Em nakevin wê hêsaniyê ku bêjin ‘Bila pêşî zextên li ser me bi dawî bibin, paşê em ê li ser pirsgirêka Kurd bifikirin’. Her wiha em nakevin wê paşxistinê ku bêjin ‘Bila em bibin desthilat, em ê her tiştî çareser bikin’. Em ê li aliyê rast ê dîrokê bisekinin û ji bo aşitiya mayinde berpirsyariyê bigirin ser xwe.” Ozgur Ozel destnîşan kir ku berpirsiyarê kûrbûna pirsgirêka Kurd û krîzên di qada demokrasî, edalet û aboriyê de ev desthilata zextker û otoriter e.
‘Hemû welatî heq dikin ku li Tirkiyeyeke bihêvî bijîn’
Ozgur Ozel di peyama xwe de banga hevgirtinê kir û got ku ji bo guhertina vê desthilatê hewcedariya Kurd û Tirkan bi hevdu heye. Ozgur Ozel wiha dirêjî da axaftina xwe: “Ji bo avakirina pêşerojeke baştir, pêdiviya me pê heye ku em birîna hevdû wekî birîna xwe bibînin. Ji bo vê yekê em ê destê xwe bixin bin bar. Ji ber ku hemû zarok, ciwan û jinên vî welatî, çi Kurd çi Tirk, heq dikin ku di Tirkiyeyeke bi hêvî û bêtirs de bijîn.” Ozgur Ozel di dawiya peyama xwe de hêvî kir ku forûm bibe alîkarê pêşeroja demokratîk a welat û silavên xwe yên piştevanî û hezkirinê ji beşdaran re şand.
