Mûzakereyên di navbera DYA û rejîma Îranê de bi daxuyaniyên tund ên her du aliyan berdewam dikin. Lê di qada navneteweyî de gefên Trump jî bersivên Îranê jî wekî blof tên nirxandin. Li gorî nirxandinên pisporên dîplomasiyê ji ber bêstratejîbûna Trump,gefên wî li hewa dimînin û Îran hindî diçe avantajê bi dest dixe.
Mûzakereyên nerasterast ên di navbera Dewletên Yekbûyî yên Amerîkayê (DYA) û rejîma Îranê de ne berdaw dikin. Lê belê daxuyaniyên ji her du aliyan ve tên kirin, nîşan didin ku bazarî û mûzakere di xaleke krîtîk de asê mane. Ligel ku hefteyek berî niha hate ragihandin ku aliyan li hev kiriye û dê peyman bê aşkera kirin jî hate zanîn ku hêj xitimîn didome.
Trump: Yan peymaneke nû yan jî encamên giran
Serokê DYAyê Donald Trump, şevê din di daxuyaniyeke xwe de bi zimanekî tund cardin gef li rejîma Îranê xwarin. Trump ku ji nû ve polîtîkaya xwe ya ‘zexta giran’xistiye dewrê, destnîşan kir ku ew ê tu carî rê nedin ku Îran bibe xwedî çeka nukleerî. Trump di axaftina xwe de wiha got: “Rêveberiya Tehranê divê rastiya nû ya cîhanê bibîne. Yan ew ê şertên me yên ji bo peymaneke nû û berfireh qebûl bikin, yan jî dê bi encamên pir girantir re rû bi rû bimînin. Em li benda peymanekê ne ku dawî li fînansekirina komên wekîl ên li Rojhilata Navîn bîne.”
Pentagon: Hemû vebijêrk li ser maseyê ne
Li aliyê din, rayedarên Wezareta Karên Derve û Wezareta Parastinê (Pentagon) ya DYAyê jî di daxuyaniyên xwe yên çapemeniyê de piştgirî dan helwesta Trump û peyama “Ji bo guhertina helwesta Îranê, hemû vebijarkên dîplomatîk û leşkerî li ser maseyê ne” dan. Lê hem gefên Trump û hem jî daxuyaniyên Pentagonê ji ber nezelalî û bêstratejîtiya Trump êdî wekî blov tên nirxandin.
Rejîma Îranê: Em li benda êrişek DYAyê ya nû nînin
Li hemberî van gefên rêveberiya Washingtonê, rejîma Îranê jî bi daxuyaniyên hişk da. Berdevkê Wezareta Karên Derve ya Îranê û rayedarên payebilind di civîneke çapemeniyê de anîn ziman ku mûzakereyên li jêr gefan nayên qebûlkirin. Rayedarên Îranî ev peyam dan: “DYA bi zimanê zext û gefan dixwaze me teslîm bigire. Lê belê heta ku hemû dorpêç û pêdankirinên aborî yên derqanûnî neyên rakirin, em ê tu peymaneke nû îmze nekin. Em li ser mafên xwe yên rewa û bernameya parastinê ya welatê xwe bi tu kesî re bazarê nakin.”
Her wiha rayedarên leşkerî yên Îranê jî angaştin ku li berda êrişek nû ya DYAyê nînin û hişyarî dan ku eger hêzên DYA an jî Îsraîlê li herêmê êrişî berjewendiyên wan bikin, ew ê bi hemû hêza xwe bersivê bidin.
