Artêşa Îsraîlê li herêma Şiwêfat a paytexta Libnanê Beyrûdê, êrişeke asmanî pêk anî. Di êrişê de fermandarê yekîneya moşekan a Tûmena Îmam Huseyîn Elî El-Huseynî hedef hate girtin.
Şer û êrişên dewleta Îsraîlê yên li dijî xaka Libnanê û hedef girtina fermandarên komên girêdayî Îranê bênavber didomin. Li gorî agahiyên dawî, artêşa Îsraîlê li paytexta Libnanê Beyrûdê careke din êrişeke asmanî ya sûîqestê pêk anî.
Êriş li başûrê Beyrûdê pêk hat
Hate ragihandin ku balafirên şer ên Îsraîlê li herêma Şiwêfat El-Emrûsiye – El-Ecnîha El-Xemsa ya ser bi Beyrûdê ve, êrişî noqteyek Hizbullahê kir. Ev herêm li başûrê Beyrûdê ye û wekî yek ji qadên ku bandora Hizbullahê lê xurt e, tê zanîn.
Fermandarê yekîneya moşekan hedef e
Li gorî agahiyan, di vê êrişa taybet de hedefa sereke fermandarekî leşkerî bûye. Hate destnîşankirin ku kesê hedef hatiye girtin, fermandarê yekîneya moşekan ê Tûmena Îmam Huseyîn Elî El-Huseynî ye. Ev tûmen, wekî hêzeke paramîlîter û çekdar a ku rejîma Îranê piştgirî dideyê û li qada şer di nava koordînasyoneke rasterast de bi Hizbullaha Libnanê re tevdigere, tê naskirin.
Îsraîlê ku di demên dawî de ji bo têkbirina binesaziya moşekî û leşkerî ya komên nêzî Îranê êrişên xwe zêde kirine, bi vê sûîqestê careke din asta rageşiyê bilindtir kir. Der barê aqûbeta Elî El-Huseynî û encamên êrişê de heta niha ji aliyê çavkaniyên fermî yên Libnanê û Hizbullahê ve daxuyaniyek nehatiye dayîn.
