Endama Lijneya Rêveber a HDKê Esengul Demîr, têkildarî xebatên kampanya 1 milyon îmze diyar kir ku eleqeya ji bo îmzeyan pir zêde ye û got: “Li kolanê hemû kesên em bi wan re diyalogê pêş dixin eleqeyek mezin nîşan didin û dixwazin şer bi dawî bibe û pirsgirêka kurd bi rêya diyalogê çareser bibe.”
Di 16ê çile de Kongreya Demokratîk a Gelan (HDK) li navçeya Beyoglû ya Stenbolê deklarasyona “Ji bo aştiyê milyonek îmze” eşkere kir. Di ser deklerasyonê re mehek derbas bû. Hevberdevkên HDKê Meral Daniş Beştaş û Alî Kenanoglû, Hevserokê Giştî yê DEM Partiyê Tuncer Bakirhan û gelek nûnerên pêkhateyên HDKê bi hevre ev deklerasyon bi raya giştî re parve kirin. Piştî deklerasyonê HDKê hem li ser medya dijîtal û hem jî bi hevkariya pêkhateyên xwe li kolan û saziyan dest bi xebata komkirina îmzeyan kir. Li ser medya dijîtal zêdetirî 5 hezar îmze hatine komkirin. Li gelek bajarên rojavayê Tirkiyeyê û Anatoliyayê xebatên komkirina îmzeyan didome. Tê gotin ku welatî, esnaf eleqeyek mezin nîşanî îmzeyan didin û piştgiriyê didin xebatê.
Armanc temas û vegotina girîngiya aştiyê ye
Endama Lijneya Rêveber a HDKê Esengul Demîr ewil têkildarî armanca kampanyayê axivî û wiha got: “Dema me ev kampanya plan kir, wê demê hêj nû meseleya aştî û diyalogê dihat axaftin. Ji ber vê yekê pêkhateyên HDKê jî şer û neçareseriya pirsgirêka kurd, wekî bingeha hemû pirsgirêkên li vî welatî pêş dikeve dît. Pêkhateyên HDKê, ji bo li vî welatî şer bi dawî bibe û pirsgirêka kurd li ser esasê çareseriya demokratîk pêş bikeve, xwest hemû raya giştî û civakê jî tev li vê meseleyê bike. Di vê pêvajoyê de derket holê ku ji bo meseleya aştî û muzakereyan pêş bikeve, ne tenê meseleya du aliyên şer dike ye. Dijberî vê yekê meseleya hemû kesên li vî welatî li ser vê axê dijî ye. Ya din jî pêwist e di vê pêvajoyê daxwazên civakê jî li ber çavan bê girtin. Dîsa ji bo ku em meseleya pêdiviya aştiyê, têxin rojeva civakê û hemû saziyan; plansaziya rêzeçalakiyan hat amadekirin. Ev plan bûn biryar. Di çarçoveya planê de bernaeya panel, seminer civînên çapemeniyê û bernameyên cuda hatin amadekirin. Dîsa kampanya îmzeyan jî bi armanca ku em derkevin kolanan û bi mirovên kolanan re têkevin têkiliyê hat plankirin. Ji bo em xwe bigînin hemû beşên civakê û mirovan, me ev kampanya da destpêkirin. Me xwest hem ji bo daxwaza aştiyê bê dîtin, îmzeyan kom bikin, hem jî ji ber ku ev îmzeyên bêne komkirin dê daxwaz û biryara gel jî nîşan bide, me ev biryar da. Dîsa di kampanyayê de hem kesên îmze bidin û hem jî kesên îmze kom bikin dê raste rast temasê pêş bixin. Ev girîng e.”
‘Çavkaniya hemû pirsgirêkan şer e’
Esengul Demîr, bal kişand ser sedema pêdiviya aştiyê jî û wiha axivî. “Di van 40-50 salên dawî yên şer de gelek tiştên bi êş pêş ketin. Sedemên pirsgirêkên aborî, civakî, siyasî û çandî, çavkaniya xwe ji şer digire. Ji ber vê yekê divê em xwe ji meseleya şer dûr bixin. Ji bo em karibin xwe ji şer dûr bixin jî divê tevahiya civakê û rêxistinên civakî bi hevre li dijî şer raweste û li dijî şer dengê xwe bilind bike. Di vê kampanyayêde em meseleya çima em aştiyê dixwazin jî niqaş dikin û parve dikin. Di vê xebatê de em dixwazin li dijî şer helwest û bertekê derxin holê.”
Li kolanan rû bi rû hevditinan dikin
Esengul Demîr, da zanîn ku di meha borî de ewil xwe gihandin der û dorê xwe û wiha berdewam kir: “Ev kampanya bi biryara hevpar a HDKê hat destpêkirin. Ji ber vê yekê hemû pêkhate û rêveberên HDKê vê xebatê dimeşînin. Di bin baneya HDKê de her yekîne li qad û derdora ku hîtabî wê dike xebatê dimeşîne. Li vir komele, rêxistinên civakî û saziyên ku xebatê li qadê dimeşînin, di serî de berê xwe didin sazî û rêxistinên ku nêzî fikr û doza wan in. Ev xebat hem li sazî û dezgehan û hem jî li kolanan rû bi rû tê meşandin, hem jî li ser platforma dijîtal jî tê meşandin. Niha zêdeyî 5 hezar îmze li ser qada dijîtal hatiye komkirin. Lê komkirina îmzeyan a li qadê û rû bi rû pir pir zêdetir e. Ev îmze hem li bajarên rojavayê Tirkiyeyê û hem jî li bajarên din têne komkirin. Me ji bo dawiya mehê encama raqamên îmzeyan ji komîsyonan xwestiye. Piştî ku dane ji bajaran kom bûn em ê li encamê binerin ka çiqas îmze hatine komkirin.”
Gel dixwaze şer bi dawî bibe
Esengul Demîr, bal kişand ser xebatên konferansê jî û wiha pêde çû: “Dîsa amadekariya meya konferansa aştiyê hebû. Me di 8-9ê sibatê de konferans li Stenbolê pêk anî. Ji ber xebatên konferansê me hemû hêza xwe dabû xebatên konferansê û ji ber vê yekê ev kampanya hinek sist bû. Piştî konferansê me dîsa hêza xwe da kampanya îmzeyan. Eleqe pir zêde ye. Ji texmînên me zêdetir eleqeya li hemberî îmzeyan heye. Ewil wate nadin sedema îmzeyan. Lê piştî ku em bi gel re diyalogê pêş dixin û em sedema komkirina îmzeyan vedibêşin, piştî em li ser armanc û sedema kampanyayê radiwestin, bê fikar îmze didin. Ev nîşanî me dide ku mirovên îmzeyan didin, bi awayekî pir cîddî dixwazin ev şer bi dawî bibe û ev pirsgirêk bi rêya aştî û diyalogê çareser bibe. Belkî ji ber zextên desthilatê û polîtîkayên tundiyê mirov nikarin derkevin kolanan û nikarin di civînên çapemeniyê de daxwaz û pirsgirêkan bînin ziman. Ji ber vê yekê dibe ku xwe dûrî meseleyê digirin, lê ji bo îmzeyan xwe paşve nagirin. Em dibînin ku ji bo çareseriya meseleyê bi daxwazek zêde eleqe nîşan dirin. Dixwazin aştî pêş bikeve. Li hemberî van kiryarên li ser kurdan pêş dikeve jî nerazî ne.”
Esengul Demîr li ser plansaziya xebatên siberojê jî rawestiya û ev agahî parve kirin: “Em ê vê kampanyayê bi xebat û rêbazên cuda berdewam bikin. Em bi rêya saziyên xwe û bi berfirehî xebata îmzeyan didomînin. Li aliyê din li ser qada tijîdal jî xebat didomin. Li ser rêbazên hêzan ên medya dijîtal em ê rêbazên nû biceribînin ku em karibin xwe bigînin her kesî. Komkirina îmzeyan a li ser medya dijîtal tenê rêbaz e. Em dixwazin gelek rêbazên komkirinê pêş bixin. Ji bo me ya herî girîng em raste rast bi mirovan re diyalogê pêş bixin û rû bi rû sedema komkirina îmzeyan vebêjin e.”
Komkirina îmzeyan amûrek e
Esengul Demîr, di berdewama nirxandinê de anî ziman ku, ji bo wan komkirina îmzeyan tenê amûrek e û wiha lê zêde kir: “Armanca ye ya esasî ewe ku em li Tirkiyeyê demek berî demekê pirsgirêka kurd çareser bikin û aştiyek mayinde pêş bixin e. Pêdiviya Tirkiyeyê gelekî bi aştiyê heye. Em dixwazin dîsa hêviya aştî û çareseriyê di hemû mirovan de pêş bixin. Ji ber ku şer her ku diçe civakê parçe dike û ji hev dûr dixe. Dîsa parçeyên li dijî hev sor dike. Em dibînin êdî hemû mirov bi fikar in û rûyê wan nakenin. Hemû jiyana wan bi rageşiyê derbas dibe. Sedama vê yekê jî zextên desthilatê yên li ser hemû beşên civakê ye. Dixwaze bi zextan hemû beşên civakê têxe kontrola xwe. Ji bo vê yekê jî biryara xwe ya dewamkirina şer didomîne. Bi vê yekê em dixwazin zorê li dewletê bikin ku êdî di şer de israr neke.”
Esengul Demîr anî ziman ku ew çiqas zêde derkevin kolanan û çiqas zêde bi mirovan re temasê çekin û meseleyê vebêjin em ê ew qas karibin bi ser bikevin û wiha pêde çû: “Ji ber şertê hewayê em zêde nikarin li kolanan standan ava bikin. Lê di demên pêş de emê li kolanan jî maseyan vekin û li kolanan îmzeyan kom bikin. Di destpêka komkirina îmzeyan de me armanc kiribû ku heta Newrozê ango dawiya adadarê. Lê dîsa li gorî geşedanên siyasî û geşedanên li Tirkiyeyê bandorê dike. Her tişt pir zû tên guhertin û li gorî wan şert tên guhertin. Di hedefa me ya ewil de heta 21ê Adarê bû. Lê li gorî geşedanên siyasî ev pêvajo dikare dirêj jî bibe. Em armanc dikin ku hemû pêkhateyên me yên van îmzeyan kom dike bi hevre biçin meclisê û van îmzeyan pêşkêşî Meclisa Mezin a Tirkiyeyê bikin. Em ê daxwazên gel ên ji bo çareseriya demokratîk, aştiya demokratîk bi raya giştî re parve bikin û em ê van îmzeyan teslîmî Meclisa Mezin a Tirkiyeyê bikin. Di demên pêş de emê xebatên ji bo îmzeyan zêdetir bikin.”
