Nûnerên rêxistinên civakî û demokratîk li gelek bajaran, operasyona siyasî ya li dijî HDKê û girtina Mehmet Turkmen protesto kirin. Di çalakiyan de peyama ‘’Dem dema yekbûn û mezinkirina têkoşînê ye’’ dan.
Nûner û rêveberên gelek rêxistinên civakî û demokratîk, li gelek bajaran operasyona qirkirina siyasî ya li dijî Kongreya Demokratîk ya Gelan (HDK) girtina Serokê Giştî yê BÎRTEK-SENê Mehmet Turkmen protesto kirin.
Hatay
Platforma Ked û Demokrasiyê ya Hatayê bi daxuyaniyeke çapemeniyê êrîş û zextên li ser HDKê protesto kir. Gelek kes beşdarî daxuyaniya çapemeniyê bûn û Endama Meclîsa Partiyê ya DEM Partiyê Hulya Kavûk daxuyanî da. Hulya Kavûk diyar ku ew li hemberî zext û binçavkirinan serî natewinîn û têkoşîna ji bo demokrasî, edalet û azadiyê nayê astengkirin û got: ‘’Dê kesên ku ji bo wekhevî, edalet û azadiyê têdikoşin, bi ser kevin. Divê demildest ev binçavkirin û zextên derqanûnî werin sekinadin û hemû hevalên me yên hatine binçavkirin, werin berdan. Divê serxwebûna darazê were dabînkirin û zextên siyasî werin bidawîkirin! Her wiha divê hikûmet dev ji polîtîkayên desteserkirina şaredariyan jî berde û rêzê li îradeya gelî bigire. Rizgarbûna vî welatî ne bi zext û bêhiqûqiyan, bi dabînkirina aşitî û demokrasiyê pêkan. Dê tu zext pêşiyê li têkoşîna gelî ya mafdar negire.’’
Mêrsîn
Platforma Ked û Demokrasiyê ya Mêrsînê jî li Parka Azadiyê daxuyaniyek da. Di daxuyaniyê de pankarta bi nivîsa ‘’Nabe ku kiryarên sendîkayî û têkoşîna kedê were astengkirin. Tavilê Mehmet Turkmen serbest berdin’’ vekirin û gelek caran dirûşmeyên ‘’Em ê li hemberî zextan serş netewînin’’ û ‘’Mehmet Turkmen ne bi tenê ye’’ hatin berzkirin.’’
Berdevkê platformê Kemal Goçmen daxuyanî da û destnîşan kir ku ew desteserkirina şaredariyan, girtin û binçavkirinan şermezar dikin û wiha axivî: “Em ê li dijî van yekan li ber xwe bidin. AKP ne bi tenê êrîşî li mixalîfan dike, di heman demê de êrîşî karker û kedkaran jî dike. Em ji Mêrsînê bang dikin; Kesên ku hatine girtin ne bi tenê serokê sendîkayê, hunermend û siyasetmedar in, her wiha têkoşîna kedê ye. Dem dema yekbûn û mezinkirina têkoşînê ye.’’
Serokê Bajêr ê EMEPê Sedat Başkavak jî li dijî êrîşên qirkirina siyasî nerazîbûnên xwe nîşan dan û got: ‘’Em bi van kiryaran dibînin ku AKP xeyala Tirkiyeyeke çawa dike. Ev zext û girtin me natirsînin û em ê li hemberî kiryarên derqanûnî li ber xwe bidin.’’
Hevberdevkê Bajêr ê YSP’ê Metîn Sut û Hevseroka Bajêr a SYKPê Canan Yuce jî li hemberî polîtîkayên AKP’ê yên zext, êrîş û girtinê nerazîbûnên xwe nîşan dan û dan zanîn ku ew ê li ber xwe bidin.
