Platforma Ked û Demokrasiyê ya Amedê têkildarî desteserkirina şaredariyan daxuyanî da. Li ser navê platformê Mustafa Mesût Kaya anî ziman ku qeyûm êrîşa li dijî vîna gel e.
Wezareta Karên Hundir di 24ê sibatê de dest danî ser şaredariya Qaxizmanê û qeyûm tayîn kir. Platforma Ked û Demokrasiyê ya Amedê têkildarî mijarê li pêş AZC Plazayê ya Ofîsa Amedê daxuyanî da. Gelek welatî, Rêveberên DEM Partiyê, DBPê, Tevgerên Jinên Azad (TJA) û nûnerên rêxistinên civakî tevlî daxuyaniyê bûn. Girseyê di çalakiyê de pankarta ‘Em vîna gel diparêzîn, Qeyûm darbe ye” rakirin û dirûşma “Qeyûm talan e berxwedan jiyan e” berz kirin. Girseyê li vir daxuyanî da û helwesta xwe nîşan da. Berdevkê Platforma Ked û Demokrasiyê Mustafa Mesut Kaya li vir daxuyanî da û qeyûm şermezar kir.
Mustafa Mesut Kaya diyar kir ku bi cezayên bêhiqûqî vîna gel desteser dikin û got: “Cezayê bêhiqûqî li Hevşaredarê Qaxizmayê yê Partiya DEMê Mehmet Alkan birin û piştî wê jî qeyûm tayînî şaredariyê kirin. Ev xeleka nû ya êrîşa sîstematîk a li dijî vîna gelê kurd e. Desthilatdariya AKPê bi polîtîkayên qeyûman ên ku bi salan e ji bo tunekirina destkeftiyên Kurdan ên demokratîk dimeşîne, aşkere mafê hilbijartinê binpê dike.
Mustafa Mesut Kaya bal kişan li ser talankirina şaredariyan û got: “Tayînkirina qeyûman ne tenê di warê siyasî de, di warê aborî de jî dibe sedema wêraniyeke mezin. Di heyama qeyûmê de deynê Şaredariya Bajarê Mezin a Wanê 8,5 milyar TL, ya Şaredariya Bajarê Mezin a Amedê 3,3 milyar TL, ya Mêrdînê jî 3,5 milyar TL derbas kir. Qeymeqam tenê deyn nehiştin, di heman demê de mal û milkên şaredariyan jî talan kirin û radestî alîgirên xwe kirin.
Mustafa Mesut Kaya da zanîn ku piştî hilbijartinê salêk derbas nebû lê desthilatdar qeyûm tayînî 10 şaredariyê DEM Partiyê û 2 şaredariyê CHPê kir. Qeyûm xizmetên zimanê Kurdî asteng dike. Em êrîşên li ser vîna gel qebûl nakin.
Daxuyanî bi dirûşma “Qeyûm dê biçin, gel dê bimîne” dawî bû.
