Navenda Nûçeyan – Hat ragihandin li nêzî Helebê du welatiyên Kurd û li Til Rifatê jî welatiyek Kurd ji aliyê komên çete ve hatin qetilkirin.
Li gorî nûçeya Ajansa Nûçeyan a Hawarê (ANHA); çavkaniyan diyar kir ku êriş li nêzî çerxerêya Şêxan a li bajarê Helebê hate kirin û di encamê de welatiyê bi navê Cemal Mursil û kurê wî Hesen ê 24 salî jiyana xwe ji dest dan û hevjîna Cemal û keça wî jî bi giranî birîndar bûn.
Birîndar rakirin nexweşxaneya Yasîn a li taxa Şêxmeqsûdê. Hate diyarkirin ku malbata bû armanca êrişê ji gundê Qert Qelat ê li rojhilatê bajarê Efrînê ye.
Welatî qetil kirin û hevjîna wî revandin
Li aliyê din çavkaniyên xwecihî dane, welatiyê Kurd ê bi navê Ehmed Hiso û hevjîna xwe jî dema dixwestin ji bajarê Til Rifetê biçin Efrînê ji aliyê çeteyan hatin gulebebarankirin.
Çavkaniyan diyar kirin ku di gulebaranê de Ehmed Hiso jiyana xwe ji dest daye û hevjîna wî birîndar bû. Li gorî çavkaniyan çeteyan hevjîna Ehmed Hiso birin cihekî nediyar.
