Şengal – Xelkê Şengalê bi pêşengiya Yekîtiya Ciwanên Êzidî û Yekîtiya Jinên Ciwan ên Şengalê li dijî êrişên çeteyên xwe dispêrin Tirkiyeyê meşek girseyî lidar xistin.
Xelkê Şengalê bi hemû sazî û dezgehên xwe bi pêşengiya Yekîtiya Ciwanên Êzidî û Yekîtiya Jinên Ciwan ên Şengalê li dijî êrişên çeteyên ku xwe dispêrin Tirkiyeyê ên li ser Bakur û Rojhilatê Sûriyeyê, meşeke girseyî lidar xistin.
Meş bi tevlîbûna sedan kesî li ber mekteba Zarîfa Osê (Mekteba Sor) ya Şengalê destpêkir û heya çerxereya Yermûkê dewam kir. Di meşê de bi sedan posterên Rêberê PKKê Abdullah Ocalan, alên Rêveberiya Xweseriya Demokratîk a Şengalê û Tevgera Ciwanan hatin hildan. Di dawiya meşê de girseyê daxuyaniya çapemeniyê dan. Daxuyanî ji aliyê berdevka Yekîtiya Ciwanên Êzidî Sara Botan ve hate dayîn.
Sara Botan di destpêka daxuyaniyê de berxwedana Rojavayê Kurdistanê silav kir û wiha got: “Em weke ciwanên Êzidî û gelê Şengalê li gel berxwedana gelê Rojava ne. Dewleta Tirk gefa dixwe û dixwaze îradeya ku bi xwîna hezaran şehîdan hatiye avakirin tine bike. Bila dewleta Tirk a dagirker û çeteyên wê baş zanibin ku ew ê tu carî nikaribin vê îradeyê tine bikin. Ji ber ku em xwedî Rêberekî weke Rêber Apo û xwedî îradeya bi hezaran şehîdan e.”
‘Em amade ne tevlî berxwedana Rojava bibin’
Sara Botan bal kişand ser sala 2014’an û da zanîn ku wê demê rojava deriyên xwe ji Şengaliyan re vekirin îroj ew jî diriyê xwe ji bo xelkê rojava vedikin û wiha axivî: ‘’Weke civaka Êzidî em jî dibêjin ku em heya dawiyê bi gelê xwe yê Rojava re ne. Civaka me yê Êzidî yên li Şehbayê koçber in, emê heya dawiyê bi wan re ne. Em weke ciwanên Êzidî amade ne ku biçin û tevlî parastina Rojavayê Kurdistanê bibin. Ji ber ku êrişên li ser Rojavayê Kurdistanê di heman demê de êrişên li ser Şengalê ye jî. Em dibêjin bijî berxwedana Rojava, bijî berxwedana YPG û YPJ. Wê serkeftin yê gele me yê Rojava be. Çawa ku di sala 2015’an de Kobanê neket wê îro jî Rojava nekeve.’’
‘Rojava û Şengal yek in’
Endama Yekîtiya Jinên Ciwan Vejîn Argeş da zanîn ku ew ê heya dawiyê piştevanên berxwedana gelan a Bakur û Rojhilatê Sûriyeyê bin û wiha got: “Îro me meşek lidarxistiye em êrişên çeteyan şermezar dikin û berxwedaniya Rojava silav dikin. Weke miletê Êzidî çi ji me were xwestin ji bo rojava em ê bikin. Rojava û Şengal yek in, bijî berxwedana Rojava bijî Rêber Apo.”
Endama Meclisa Jin ya Xanesorê Henîf Celal jî bang li her kesî kir ku ji bo parastina civakê amade bin û wiha got: “Mixabin dîsa çete êrişî Rojavayê Kurdistanê dikin û kuştin û koçberiyê bi xwere tînin. Em berxwedaniya gelê Rojava pîroz dikin. Lê dive em jî weke civaka Êzidî hişyar bin û pişevaniya hêza xwe bikin û ji li himberî her êrişekî em bisekinin.”
