Amed – Nivîskarê girtî Îlhan Dayan, piştî 32 salan girtî ma, ji Girtîgeha Amedê hate berdan. Îlhan Dayan got: “Hêvî dikim ku di demeke nêz de hemû deriyên girtîgehan bên vekirin. Em ê li ser axa xwe ya pîroz, bi hev re govenda azadiyê bigirin.”
Girtî Îlhan Dayan ê helbestkar ku di sala 1993yan de li Manîsayê hate binçavkirin û girtin piştî 32 salan ji Girtîgeha Hejmara 2yan a Tîpa T a Amedê hate berdan. Malbat û hevalên Îlhan Dayan, Komeleya Alîkarî û Piştgiriyê ya bi Malbatên Girtî û Hikumxwaran re (TUAY-DER) ya Amedê, endamên DEM Partiyê û dayikên Nobeta Edaletê li pêş Girtîgeha Amedê Îlhan Dayan bi kulîlkan pêşwazîkirin. Dema malbatê û dayikan kulîlk dan Îlhan Dayan dirûşma “Bijî Berxwedana Zindanan” hate berzkirin û hin ferdên malbatê bi hestiyar bûn.
‘Em ê bi hev re govenda azadiyê bigerin’
Îlhan Dayan ku li pêş girtîgehê axaftineke kurt kir, diyar kir ku ji ber gelek hevalên wî li pişt dîwaran mane xemgîn e û wiha got: “Hêvî dikim ku di demekî nêz de hemû deriyên girtîgehan bên vekirin. Em ê li ser axa xwe ya pîroz, bi hev re govenda azadiyê bigirin. Em bi hestên Newrozê ketin hefsê, em bi hestên Newrozê jî derketin. Di girtîgehê de jî me bi hestên Newrozê jiyan kir. Hêvî dikim ku bi hemû nirxên xwe bi hev re û bi awayekî azad em ê bijîn. Ew roj jî ne dûr e.”
Îlhan Dayan spasiyên xwe pêşkeşî dayikan û kesên ji bo pêşwazîkirina wî hatin ber girtîgehê kir û wiha domand: “Me hesta herî zêde ji dayikên xwe yên laçik spî digirt. Dema ku dilê dayikan bi me re be çi dibe bila bibe ji bo me jiyan e hêvî ye.” Kesên Îlhan Dayan li pêş girtîgehê pêşwazîkirin ew bi tilîliyan ber bi mala wî ya li navçeya Serêkaniyê ya Rihayê ve bi rê kirin.
Ewilî di sala 1991an de tê girtin û 9 rojan tê îşkencekirin
Nivîskar Îlhan Dayan ewilî 1991 yan de li navçeya Serêkaniyê ya Rihayê bi îdiaya “alîkariya rêxistinê kiriye” tê girtin piştî 9 rojan di bin çavan de li gel hevalên xwe îşkenceyê dibînin wan dişînin Girtîgeha Rihayê û piştî 2 rojan sirgunî Girtîgeha Amedê tên kirin. Îlhan Dayan piştî 6 mehan girtî dimîne, tê berdan. Ji vê dosyayê 2 sal û 6 meh ceza li Îlhan Dayan tê birîn. Pişt re Îlhan Dayan di 6ê Tebaxa 1993yan de li Manîsayê tê binçavkirin û di 18ê Tebaxa 1993yan de tê girtin. Dû re Dadgeha Ewlekariyê ya Dewletê (DGM) ya Îzmîrê bi îdiaya “xerakirina yekitî û yekparetiya dewletê” cezayê muebedê li Îlhan Dayan dibire. Îlhan Dayan ê piştî 32 salan hate berdan bi rêzê li Girtîgehên Manîsa, Îzmîr, Aydin, Elbistan, Mîdyad, Kalkandere ya Rîzeyê, Mêrdîn û Amedê tê ragirtin.
Her wiha bi navê “Diyariyên Şevê”, “Xeyalbêj” û “Bêrîjan” sê pirtûkên helbestan ên Îlhan Dayan hene.
