Serokê Giştî yê CHPê Ozgur Ozel di Desteya Awarte a partiya xwe de got: “Tayyîp Erdogan êdî veguheriye serokê cuntayê. Êdî rewatiya Erdogan nîn e.”
Li Enqereyê 21emîn Desteya Awarte ya CHPê li Navenda Çandê ya Nazim Hîkmet dest pê kir. Serokê Giştî yê CHPê yê berê Kemal Kiliçdaroglû, Altan Oymen, Hîkmet Çetîn û gelek kes tev li bûn. Saetek piştî destpêkirina kongreyê, Şaredarê Mûtapaşa ya Antalyayê Umît Uysal namzetiya xwe bi paş ve kişand.
Serokê Giştî yê CHPê Ozgur Ozel di kongreyê de axivî û operasyona li dijî Şaredarê Bajarê Mezin a Stenbolê Ekrem Îmamoglû weke “hewldana derbeyê ya serneketî” nirxand û got: “Lingekê vê planê jî tayînkirina qeyûm a li ser partiya me bû û îro ji bo têkbirina vê planê em li vir in. Baweriya me ya bi demokrasiyê bêdawî ye.”
‘Êdî Erdogan ne rewa ye’
Ozgur Ozel destnîşan kir ku pirsgirêkên li Tirkiyeyê dê ji hêla gel ve bên çareserkirin û got: “Yên derbeya nû plan kirin, weke kesên cunta ku di hilbijartina din de winda kirin, niha li daîreyên dewletê yên li qesrê de dimînin. Lê kolan û îrade ya gel e, bi me re ne. Ew cunta hevalên me dîl digire. Îro cuntayeke ku ji hilbijartinê ditirse, ji hevrikên xwe ditirse, ji gel ditirse welat bi rê ve dibe. Tayyîp Erdogan ne serokkomarekî bi piştgiriya gel li wir e. Veguheriye serokê cuntayê ku kesên piştgiriya gel wergirtine hedef digire. Êdî tu rewatiya Tayyîp Erdogan nîn e. Îradeya li vir dê wê cuntayê ji hev belav bike. Tirkiye ji komeke cuntayê mezintir e.”
Xwest Erdogan di TRTê de derkeve pêşberî wî
Ozgur Ozel di dewama axaftina xwe de Tayyîp Erdogan vexwend weşana zindî û got: “Ez parêzerê Îmamoglû û van doza me. Heke tu jî dozgerê van dozên Akin Gurlek bî, bînin em vê hefteyê darizandinê bikin. Werin em li ser ekranên TRTê zindî biweşînin.”
