Kurd û dostên kurdan li gelek bajarên Ewropa li dijî êrîşên li ser Bakur û Rojhilatê Sûriyeyê daketin qadan û bertekên xwe anîn ziman.
Kurdistanî û dostên Kurdan li bajarên Oberhausen, Dortmund, Innsbruck, Saarbrucken û Darmstadtê yên Ewropayê êrişên dagirkeriyê yên li ser Rojavayê Kurdistanê û Bakur û Rojhilatê Sûriyeyê bi çalakiyan protesto kirin.
Oberhausen
Kurdistaniyên li bajarê Oberhausen ê dijîn, li ser banga DKTMê li ber Navenda Trenê hatin ba hev û êrişên dagirkeriyê yên li ser Rojava protesto kirin. Dostên Kurdan ên Alman jî tevlî çalakiyê bûn. Di çalakiyê de alên YPG û YPJê hildan û bêyî navber dirûşmên “Bij berxwedana Rojava”, “Bijî YPG” û “Bijî YPJ” hatin berzkirin.
Çalakî bi rêzgirtina ji bo giyanê şehîdan dest pê kir. Di çalakiyê de Hevserokê DKTM-Duisburgê Ehmed Kobabê, li ser navê Rêxistina Ciwanên Tamîl a Oberhausen û Partiya Çep (Die Linke) axaftin kirin. Di axaftinên hatin kirin de êrişên dagirkeriyê hatin protestokirin û gotin: “Divê tecrîda li ser Rêber Apo were rakirin û Rêber Apo azad bibe.”
Di çalakiyê de daneza KON-MEDê ya bi zimanê Almanî û Kurdî hat xwendin. Di daxuyaniyê de banga parastina Şoreşa Rojava hat kirin.
Çalakî bi dirûşmeyên “Bijî berxwedana gerîla”, “Bijî berxwedana Rojava”, “Bijî berxwedana YPG/YPJ”, “Terorîst Erdoğan” û “Kurdistanan wê ji faşîzmê re bibe goristanan” bi dawî bû.
Dormund
Li navenda bajarê Dortmundê jî li dijî êrişên dagirkeriyê yên li ser Rojava mîtîng hat lidarxistin. Di mîtîngê de alên YPG, YPJ û wêneyê Rêberê PKK Abdullah Ocalan hildan. Di mîtîngê de bêyî navber dirûmên “Bijî Serok Apo”, “Dewleta Tir bicehime” û “Piştevaniya navneteweyî” berzkirin.
Di mîtîngê axaftin hatin kirin û bal kişandin bi ser êrişên dagirkeriyê yên li ser Rojava. Mîtîng bi dirûşman bi dawî bû.
Innsbruck
Li bajarê Innsbruck ê Awûstûryayê, êrişên dagirkeriyê yên li ser Rojava û Helebê bi çalakiyekê hat protestokirin. Gelek Kurdistanî tevlî çalakiya ber peykerê Annasäule ya li caddeya Maria-Theresienê bûn. Çalakî bi rêzgirtina ji bo giyanê şehîdan dest pê kir. Di çalakiyê de axaftin hatin kirin. Axaftvanan bal kişand bi ser êrişên çeteyên dewleta Tirk ên li dijî sivîlan û gotin: “Sûcên li dijî mirovahiyê tên kirin.”
Di çalakiyê de danezên li ser êrişên dagirkeriyê yên bi zimanê Elmanî hatin belavkirin. Çalakî bi dirûşmên Kurdî û Almanî bi dawî bû.
Saarbrucken
Kurdistaniyên ku li stasyona trenê ya navendî ya Saarbrucken a Almanyayê hatin ba hev, êrişên dagirkeriyê yên li ser Bakur û Rojhilatê Sûriyeyê bi mîtîngê şermezar kirin û peyamên dilsoziya bi berxwedana gelê Rojava re dan. Di çalakiyê de banga tevlîbûna meşa ku sibe li bajêr bê lidarxistin hat kirin. Çalakî bi berzkirina dirûşmên “Bijî berxwedana HSDê”, “Bijî berxwedana Rojava”, “Bê Serok jiyan nabe”, “Bimre xiyanet”, “Dagirker ji Rojava bicehemin” û “Terorîst Erdogan” bi dawî bû.
Darmstadt
Li bajarê Darmstadt ê Almanyayê ji bo piştgiriya Rojava meşek hat lidarxistin. Çalakiya ku ji aliyê Meclisa Gel ve hat lidarxistin bi deqeyek rêzgirtina ji bo şehîdên azadiyê dest pê kir. Bi dehan Kurdistanî, endamên Komeleya Piştevaniya Rojava ya Almanyayê û nûnerên partiya Dîe Lînke beşdarî meşa ku li kolana herî qelebalix a bajêr hat lidarxistin, bûn.
Hevserokê FCDK-KAWA’yê Mehmet Çopan di çalakiyê axivî û bal kişand ser lîstikên li ser Rojava. Çopan diyar kir ku ciwanên Kurd wê li dijî êrişên dijmirovahî têdikoşin û got, “Em ê her roj li qadan bin.”
Gelek saziyên li Elmanyayê jî peyamên piştgiriyê dan. Di meşê de ku pankart û alên mezin ên TEV-DEM’ê ya Rojava hatin hilgirtin û dirûşmên “Qatil Erdogan”, “Bijî berxwedana Rojava” û “Rojava ne bi tenê ye” hatin berzkirin.
Meş bi banga beşdarbûna mîtînga navendî ya sibê saet di 13.00 de li Qada Alte Opera ya Frankfûrtê bê lidarxistin, bi dawî bû.
