Fraksiyonên Kurdistanî, biryara boykotkirina civîna îro ya Parlamentoya Iraqê dan. Ji ber paşxistin û astengkirina dengdana li ser parêzgehbûna Helebceyê, hemû lîsteyên Kurdistanî yên li Parlamentoya Iraqê bi yekdengî biryara boykotkirina rûniştina îro ya Parlamentoyê Iraqê dan.
Endama Parlamentoya Iraqê ji Fraksiyona YNKê û Nûnera Helebceyê Çiro Hemeşerîf ragihand ku hemû Fraksiyonên Kurdistanê bi yek helwestê biryar dan ku heta dengdan li ser projeyasaya parêzgehbûna Helebceyê nexin bernameya kar ya parlamentoyê, beşdarî ti civînên Parlamentoyê nabin.
Çiro Hemeşerîf da zanîn ku qebûl nakin ku dengdana proje yasaya Helebceyê bi proje yasayek din ve were girêdan. Endamê Parlamentoya Iraqê yê li ser lîsteya YNKê Biryar Reşîd di daxuyaniya çapemeniyê de ragihand ku ji bo parêzgehbûna Helebceyê, dê civînên Parlamentoya Iraqê baykot bikin.
Xwendina yekem û duyem li ser projeyasaya parêzgehbûna Helebceyê hatiye kirin, tenê dengdan maye. Lê çend carin bi hincetên cuda, runiştinên li ser vê yasayê tê paşxistin û astengkirin. Lewma hemû lîsteyên Kurdistanî yên li Parlamentoya Iraqê bi yekdengî biryara boykotkirina rûniştina îro ya Parlamentoyê dan.
