Berdevkê Wezareta Karên Derve ya Îranê Îsmaîl Bekayî têkildarî hevdîtina ku dê li Ummanê bi DYAyê re bê kirin, got: “Em şanseke rastîn didin dîplomasiyê.”
Îran û Dewletên Yekbûyî yên emerîkayê (DYA) bi armanca çareserkirina nakokiyên nukleerî ku ev demeke dirêje didome dê di 12ê Nîsanê de li Ûmmanê dest bi hevdîtinan bikin. Hevdîtinên ku wê bi beşdarbûna Wezîrê Karên Derve yê Îranê Abbas Arakçî û Nûnerê Taybet ê Rojhilata Navîn ê DYAyê Steve Witkoff werin kirin, wê bi navbeykariya Wezîrê Karên Derve yê Ûmmanê Badr al-Busaidi pêk werin.
Berdevkê Wezareta Karên Derve yê Îranê Îsmaîl Bekayî têkildarî mijarê daxuyanî da û got: “Em bi cidîbûn û jidiliya xwe şanseke rastîn didin dîplomasiyê. DYA tevî gotinên xwe yên dijminane jî divê vê biryarê pîroz bike. Em têkildarî hevdîtinan pêşdaraz nêz nabin. Em ê roja Şemiyê li inyet û cidîbûna DYAyê binêrin û li gorî wê gavên xwe biavêjin.”
