Girtiyê nexweşê giran Mehmet Emîn Çam ku 6 roj berê qeyrana dil derbas kir, ji nexweşxaneyê dîsa şandin girtîgehê. Keça wî Şîmel Çam destnîşan kir ku ji tenduristiya bavê xwe bi fikar in.
Girtiyê nexweşê giran Mehmet Emîn Çam ê 61 salî ku li Girtîgeha Girtî ya Tîpa T a Beşîrî ya Êlihê girtî ye, di 16ê Nîsanê de qeyrana dil derbas kirin. Mehmet Emîn Çam rakirin Nexweşxaneya Lêkolîn û Perwerdehiyê ya Êlihê û li wir hîn dermankirina wî bi dawî nebû îro (22yê Nîsanê) dîsa şandin girtîgehê. Keça Mehmet Emîn Çam Şîmel Çam derbarê mijdarî de axivî û diyar kir ku bavê wê dîsa birine girtîgehê û got: “Bijîşkan digotin pîvanên nexweşiya wî kêm dibe, nedifikirîn ku bavê min bişînin girtîgehê. Beriya ku bijîşk kontrola dawî bikin bi lez û bez bavê min birin girtîgehê. Bijîşk got ku dê her du demarên din bi dermanan tedawî bikin û rewşa bavê min bişopînin. Lê bêyî dermankirin biqede ew şandin girtîgehê.
Şîmel Çam anî ziman ku ew ê careke din serî li ATK’ê bidin û got: “Beriya ku bavê min krîza dil derbas bike serlêdana me hebû û wî derxistin pêşberî şandeyê. Lijneyê bêyî ku tiştekî bibêjin her tişt ji Saziya Tiba Edlî (ATK) re hiştin. Me raporên bavê xwe girtin û em ê dîsa serlêdanê bikin. Em hêvî dikin ku vê carê bersiveke erênî bidin.”
