AKomîteya Amedekar a 1ê Gulanê ya Amedê gel vexwend mitînga li Qada Îstasyonê. Hevserokê Giştî yê KESKê Ahmet Karagoz diyar kir ku bi ji ber polîtîkayên desthilatê her kes winda dike û ji ber vê ew gelê vedixwînin mitînga 1ê Gulanê.
Li Amedê îsal 1ê Gulanê Roja Kedkar û Karkaran a Cihanê li Qada Îstasyonê dê were pîrozkirin. Komîteya Amadekar bênavber amadekariyên ji bo mitîngê didomîne. Konfederasyona Sendîkayên Karkerên Şoreşger (DÎSK), şaxên Konfederasyona Sendîkayên Kedkarên Cameweriyê (KESK) ên Amedê, Odeya Bijîşkan ya Amedê û Yekitiya Odeyên Avahîsaz Endezyaran a Tirk (TMMOB) têkildarî amadekariya mitîngê li avahiya Sendîkaya Kedkarên Xizmetên Civakî û Tenduristiyê (SES) civîna çapemeniyê li dar xist û gel vexwend mitînga 1ê Gulanê.
Di daxuyaniyê de Hevserokê Giştî yê KESKê Ahmet Karagoz, endam û rêveberên sendikayan, saziyên sivîl tev li bûn û pankarta “Ji bo azadiya kedê û civaka demokratîk werin 1ê Gulanê ” hat daliqanin.
Hevserokê Giştî yê KESKê Ahmet Karagoz daxuyanî xwend. Karagoz diyar kir ku mafê her kesî ji aliyê hikûmetê ve tê binpêkirin û ew li dijî krîza aborî, polîtîkayên zordariyê û neheqiyê mitîngên 1ê Gulanê li dar bixin. Kargoz anî ziman ku zext û polîtîkaya binçavkirin û girtinê li ser kesî tê meşandin. Karagoz anî ziman ku divê pirsgirêka Kurd bi rêy ademokrasiyê were çareserkirin û xwest demildest aştî û çareserî pêk were. Karagoz destnîşan kir ku her beşên civakê di warê aborî û di her warên din de her tiştê xwe winda dike û xwest her kes li dijî vê yekê tev li mitîngên 1ê Gulanê bibin.
Piştî daxuyaniyê Berdevkê Platforma Şaxan a KESKê ya Amedê Mehmet Nûr Ûlûs agahiyên teknîkî yên mitîngê vegot û da zanîn ku ew ê bi kortêjan bimeşin Qada Îstasyonê. Ûlûs diyar kir ku Hevserokê Giştî yê KESKê Ahmet Karagoz, Endemê Konseya Navendî ya TTBê Mehmet Şerîf Demîr û Hevserokê Giştî yê DEM Partiyê Tuncer Bakirhan dê wek axevêr tev li mitîngê bibin û her wiha stranbêj Kasim Taşdogan û Helîm Omerî jî dê konserê bidin.
