Hevseroka Giştî ya DEM Partiyê Tulay Hatîmogûllari, tev li “Panela Aştî û Civaka Demokratîk” a Wan-YYU-DOBê bû û got: “Erka hevalên me yên ciwan mezin e. Li gel çalakiya pratîk, berpirsyariya me hemûyan heye ku em xet û hişmendiya xwe ya bîrdozî ava bikin û xeta pratîkî bi rêxistin bikin.”
Hevseroka Giştî ya Partiya Wekhevî û Demokrasiyê ya Gelan (DEM Partî) û endama Şandeya Îmraliyê Tulay Hatîmogûllari, tev li “Panela Aştî û Civaka Demokratîk” ku ji aliyê Yekitiya Xwendekarên Demokratîk a Zanîngeha Yuzuncu Yilê ya Wanê (Wan-YYU-DOB), bû. Panel li Eywana Azîz Yûral a KESKê ya li navçeya Rêya Armûşê ya Wanê hat lidarxistin. Gelek xwendekar û ciwan tev li panelê bûn.
‘Ev bang ji bo pirsgirêka Kurd gelek girîng e’
Di panelê de ewilî Tulay Hatîmogûllari axivî û behsa “Banga Aştî û Civaka Demokratîk” a Rêberê Gelê Kurd Abdullah Ocalan kir. Tulay Hatimogullari, anî ziman ku wan ev bang bi hemû pêkhateyên civakê re nirxandiye û wê ev nirxandin bidome. Tulay Hatîmogûllari da zanîn ku dê serdana 3 mîlyon malbatan bikin û got: “Di vê pêvajoyê de hêza herî girîng ciwan in. Ev daxuyaniya birêz Abdullah Ocalan ronîkirina geşedanên siyasî yên cîhanê ye û em dikarin van geşedanên li cîhanê baştir fêm bikin û bi rastî jî têbigihêjin ku ev bang tê çi wateyê. Ev bang ji bo çareseriya pirsgirêka Kurd li Tirkiyê, ji bo çar parçeyên Kurdistanê û ji bo Sûriye û Rojava ku li kêleka me ne, xwedî girîngiyeke mezin e.”
‘Divê ciwan xwedî li bangê derbikevin’
Tulay Hatimogullari, bal kişand ser hevdîtina wan a bi Rêberê Gelê Kurd Abdullah Ocalan re û ev tişt got: “Birêz Ocalan di hevdîtinê de got ku konsepta netew-dewletê mehkûmî qeyranê ye. Lewma hilweşîna wê jî dê çêbe. Divê em alternatîfekê ava bikin, alternatîf jî civaka demokratîk e û ji bo vê yekê jî divê em rêxistin bibin. Gava em lêdinêrin di dîroka têkoşînê de ciwan hertim sereke bûne. Lewma divê herî zêde ciwan li vê bangê xwedî derbikevin û li gor wê rêxistinkirinê mezin bikin. Di vî warî de tişta ku Birêz Abdullah Ocalan di vê bangê de anî ziman ew e ku her kes xwe birêxistin bike, bi rêxistinbûna xwe civakê veguherîne û demokratîk bike. Di vê wateyê de hevalên me yên ciwan bêguman xwedî erkên mezin in. Li gel çalakiya pratîk, erk û berpirsyariya me hemûyan heye ku em xet û hişmendiya xwe ya bîrdozî ava bikin, teoriya xwe pêş bixin, hişmendiya xwe pêş bixin û bi vê hişmendiyê xeta pratîkî bi rêxistin bikin.”
Piştî axaftina Hatîmogûllari, panel ji çapemeniyê re girtî berdewam kir.
