Şaredariya Peyasê bi boneya 15ê Gulanê Cejna Zimanê Kurdî li avahiya şaredariyê Yekeya Parastin û Pêşvebirina Zimanê Kurdî vekir. Hevşaredar Cengîz Dundar destnîşan kir ku dê yekeya wan li dijî qedexeyan bersivek e. Hevşaredar Berîvan Gulşen Sîncar jî diyar kir ku ew ê li her qadê parastina bi Kurdî bidomînin.
Îro bi boneya 15ê Gulanê Cejna Zimanê Kurdî li gelek bajarên bakurê Kurdistanê û Tirkiyeyê çalakiyên gelek rengîn tên lidarxistin û meş û daxuyanî dê bên lidarxistin. Şaredariya Peyasê jî bi boneya 15ê Gulanê Cejna Zimanê Kurdî, çalakî û bernameyên cuda li dar xist. Di çarçoveya van çalakiyan de, li avahiya şaredariyê Yekeya Parastin û Pêşvebirina Zimanê Kurdî bi awayekî fermî hate damezrandin û vekirin. Di merasîma vekirinê de hevşaredarên Peyasê Bêrîvan Gulşen Sîncar û Cengîz Dundar, endamên Meclisa Ziman, Gerînendetiya Çand û Karên Ciwanan, xwendekarên biçûk ên Zarokistanan, xebatkar û gelek hemwelatî beşdarî vekirin û pîrozbahiyê bûn.
Meşa Zarokan û dengê govendê
Bername li ber avahiya şaredariyê bi meşa zarokan dest pê kir. Zarokên ku bi cil û bergên xwe yên herêmî tev li pîrozbahiyê bûn, heta ber deriyê şaredariyê meşiyan û bi stranên Kurdî girse coşandin. Piştî stranên zarokan, li baxçeyê şaredariyê merasîma vekirina Yekeya Parastin û Pêşvebirina Zimanê Kurdî hat lidarxistin.
Cengîz Dundar: Ev yeke li dijî qedexeyan bersiveke
Hevşaredarê Peyasê Cengîz Dundar di merasîmê de bal kişand ser dîroka 15ê Gulanê û wiha got: “Di sala 1932an de bi pêşengiya Celadet Elî Bedirxan û hevalên wî yên rewşenbîr gaveke dîrokî hate avêtin. Tevî polîtîkayên asîmîlasyonê yên netew-dewletan, em îro wekî dewamkerên wê mîratê, vê asîmîlasyonê qebûl nakin. Ev yekeya ku em vedikin, li dijî qedexeyan bersivek e.”
Berîvan Gulşen Sincar: Zimanê me jiyana me ye
Hevşaredar Berîvan Gulşen Sincar jî destnîşan kir ku ziman nasnameya wan e û got: “Tevî ku piştî Peymana Lozanê asîmîlasyoneke giran li ser zimanê me hat ferzkirin jî, rewşenbîrên me ev qedexe qebûl nekirin. Em ê weke şaredarî di her qadê de xebatên parastina Kurdî bidomînin.”
Hawar dengê zanînê ye
Endamê MED-DERê Rifat Ronî jî deşîfreya rûpela yekem a Kovara Hawarê bi bîr xist û wiha axivî: “Hawar dengê zanînê ye, zanîn xwenasîn e. Kesê ku xwenas dike, dikare xwe bide naskirin jî.”
Piştî axaftinan, deriyê “Yekeya Parastin û Pêşvebirina Ziman” bi merasîmekê hat vekirin. Hat diyarkirin ku ev yeke dê ji bo zaravayên Kurmancî û Kirmanckî yên Kurdî xebatên akademîk û civakî bimeşîne. Piştî vekirina fermî, welatî û beşdarên merasîmê li baxçeyê şaredariyê bi hev re govend gerandin.
Pîrozbahiya li Zarokistanan
Di heman demê de, li Kreş û Mala Lênihêrtinê ya Perperik û Xalxalokê ya girêdayî Gerînendetiya Çand û Karên Civakî ya Şaredariya Peyasê, zarokên ku perwerdeya pirzimanî dibînin, bi coş û kêf Cejna Zimanê Kurdî pîroz kirin.
Zarokan bi cil û bergên neteweyî û herêmî xwe xemilandin, stranên Kurdî gotin, govend gerandin û bi çalakiyên hunerî û çandî yên cuda kêf kirin.
Xebatkarên kreş û zarokistanê diyar kirin ku ew bi perwerdeya pirzimanî re dixwazin çand, huner û kevneşopiyên dewlemend û giringiya vê rojê ji zarokan re ragihînin û bi vî awayî binyata hişmendiyê ya nasnameya wan xurt bikin. Bi vê armancê, bi boneya 15ê Gulanê çalakî û şahiyên taybet ên cihêreng hatin lidarxistin.
Mamoste û zarokan di vê şahiya germ de kêlî û bîranînê xweş jiyan kirin û bi coş Cejna Zimanê Kurdî pîroz kirin.
