Şêniyên navçeya Mexmûrê serdana konê çalakiyê ku şêniyên Wargeha Mexmûrê li dijî rêgirî, girtin û ambargoya ku dewleta Iraqê li ser wargehê dimeşîne, kirin.
Wargeha Penaberan a Şehîd Rûstem Cûdî (Mexmûr) ji 2019an û heta di bin dorpêç û êrîşên Hikûmeta Herêma Kurdistanê de ye. Hikûmeta Herêmê bi tu awayî nahêle ne karker, ne nexweş, ne xwendevan û ne tiştek derbazî herêma Kurdistanê bibin. Her wiha ji 10ê Nîsana îsal ve jî Hikûmeta Iraqê ambargoyek daniye li ser wargehê ku ew jî bi tu awayî nahêle ne kelûpelên avahîsaziyê bên wargehê û ne jî dihêlin karker, nexweş ji wargehê derbikevin. Bi wê ve girêdayî pêwîstiyên nexweşxane, şaredarî û dibistanan jî nayên pêşwazîkirin, ev jî dibe sedem ku pirsgirêk di nava wargehê de derbikeve.
Ji bo çareserkirina van pirisgirêkan û rêgirî û ambargoya heyî, şandeyek ji wargehê berê xwe dan Bexdayê li wê derê bi Wezîrê Dadê yê Iraqê Xalid Şiwanî re hevdîtinek pêkanî û di vegerê de ji aliyê hêzên Iraqê ve hatine dîlgirtin.
Bi vê boneyê şêniyên wargehê ji bo berdana wan girtiyan, rêgirî û ambargoya heyî, konê çalakiyê li ber benda kontrolê ya hêzên Iraqê danîne.
Çalakiya kon di roja sêyemîn de bi biryardariyek xurt û girseyî, berxwedanek bêhempa tê meşandin. Armanca xelkê wargehê ewe ku heta ev ambargo, rêgirî û girtinên tên pêkanîn bi dawî nebin, dest ji çalakiya xwe bernadin.
Li ser vî bingehî şêniyên navçeya Mexmûrê jî serdana çalakvanên wargehê kirin û piştigiriya xwe ya bi gelê wargehê re anî ziman. Her wiha diyar kirin ku wek xelkê navçeya Mexmûr tişta ku bikeve ser milên wan ew amade ne pêk bînin.
