Nivîskarê Rojnameya Xwebûnê Ramazan Olçen, di quncikê xwe yê vê hefteyê de bal dikişîne ser pêvajoya heyî û destnîşan dike ku êdî derwa fikr û pênûsê ye.
Nivîskarê Rojnameya Xwebûnê Ramazan Olçen vê hefteyê cih da erk û berpirsiyariya pêvajoyê. Nivîskar Ramazan Olçen, diyar dike ku bi vê mîrasa mezin meş û mezinkirina mîrasê di destê wan de ye û dibêje: “Serketin ya Rêber Apo, ya PKKê, ya şehîdên dozê, ya gelê Kurd û hêzên demokrasî û şoreşê ye. Ev dewr, dewra çeka herî xurt e. Dewra fikir û pênûsê ye. Fikir û îlma Apoyî wê bi xwe re serketinê bîne. Ev zafer a gelê Kurd û hemû gelan e.”
Nivîskar Ramazan Olçen, balê dikişîne ser kongreya PKKê û dibêje: “Partiya Karkerên Kurdistanê PKKê Kongreya xwe ya 12an a Awarte li dar xist. Bi vê kongrê dawî li sazûmaniya bi nave xwe anî û xwe fesix kir. Ev ji bo dîroka Kurd û Kurdistanê werçerxeke nû destnîşan dike. Ez ê hewl bidim ku nirxandineke li ser kongreyê bikim lê beriya wê dixwazin li ser wêneyê ji kongreyê derketî çend tiştan bibêjim. Di dema ku bi 10 hezaran caran li her Herêmên Parastinê yên Medyayê bombe dihatin barandin de, li du qadên cuda bi hemwextî bi tevlêbûna 232 delegeyan kongre pêk anî. Rapora polîtîk a Rêber Apo ji bo kongreyê hate xwendin, heta bi awayekî bi îmkanên teknîkî Rêber Apo tevli kongreyê bûye. Ev bi serê xwe bûyer û geşedanên girîng in. Ji wan qadên şer hatina fermandaran, rêveberên tevgerê bi serê xwe xwedî wateyeke girîng e. Cîhanê hemû di ragihandina xwe de cih da dîmen û wêneyan. Li cîhanê deng veda.
Kongreyê hêza Rêber Apo jî careke din tescîl kir. Rêber Apo weke avakerê partiyê xwest ku partiya ku di oxira azadkirina gel de weke amûra demê bê bikaranîn, xwe fesix bike. PKKê jî bi kongreyê ev kir. Êdî amûr guherî. Delegasyona kongreyê da zanîn ku ew Apocî ne û wê dîsa bi ilmê Apoyî têkoşînê bidomînin, mezin bikin. Bi PKKê re rûpelek li dîroka Kurdistanê hatibû vekirin. Her tîp û peyvên wê ji agir û bi bedêl hatin nivîsandin, bi nirxên mezin hatin nivîsandin. Ev rûpela zêrîn tê girtin û rûpeleke nû li dîroka Kurdistanê tê vekirin.
Pêşengên tevgerê bi tecrûbe, aqil, hest, mêjî û dilê xwe dê pêşengiyê ji vê demê re jî bikin. Wê jin û ciwan, civak bi xwe rûpela nû bi hişmedî û serwextiya têkoşîna 52 salan, hîn bi xurtî binivîse. Ew dîroka reşzivirî wê bi ked û têkoşînê bê guhertin. PKKê dewrek girt û derî li dewreke nû vedike. Gelê Kurd bi saya PKKê bi xurtî derketiye ser dika dîrokê. PKKê îmkan çêkir ku gel bi xwe dîroka xwe binivîse.
Di salên 1970yî de dema Koma Apocî dest bi vî karê pîroz kir, ti derfet tunebû. Kurdayetî li çiyayê bi ezamet ê Agiryê hatibû meftûnkirin. Lê Apociyan ev gel ji gorê rakir. Dara hişkbûyî şîn kir. Vê darê fêkî dan. Hem jî fêkiyên pir bi lezzet. Ev dara hişk bi xwînê hat avdan. Wisa hêsan nîn e. Xwedîderketina li vê mîrasê weke erkeke li ser mile Klana Apoyî û gelê Kurd e. Bi vê mîrasa mezin meş û mezinkirina mîrasê di destê me de ye. Serketin ya Rêber Apo, ya PKKê, ya şehîdên dozê, ya gelê Kurd û hêzên demokrasî û şoreşê ye. Ev dewr, dewra çeka herî xurt e. Dewra fikir û pênûsê ye. Fikir û îlma Apoyî wê bi xwe re serketinê bîne. Ev zafer a gelê Kurd û hemû gelan e.
