Amed – Welatiyên Amedê têkildarî pêvajoya çareseriyê xwestin Rêberê Gelê Kurd Abdullah Ocalan azad bibe û mafên Kurdan demildest bên dayîn.
Rêberê Gelê Kurd Abdullah Ocalan di 27ê Sibatê de banga “Aştî û Civaka Demokratîk” kir. Piştî bangê Partiya Karkerên Kurdistanê (PKK) 12ê Gulanê encamnameya kongereya xwe eşkere kir û ragihand ku xwe fesix kiriye. Piştî gavavêtina PKKê, gelê Kurd jî dixwaze dewlet gavan biavêjê û mafên gelê Kurd bên mîsogerkirin. Welatiyên Amedê têkildarî pêvajoyê ji ajansa me re axivîn.
‘Baweriya me bi dewletê nayê baweriya me bi birêz Ocalan tê’
Welatiyê bi navê Elî Erdem diyar kir ku heta Rêberê Gelê Kurd Abdullah Ocalan azad nebe baweriya gel bi tiştekî din nayê û wiha axivî: “Baweriya me dewletê nayê ji bo na wê em azadiya Rêber Apo dixwazin. Heta ku em Rêberê xwe di nava gel de nebinin em dewletê bawer nakin. Baweriya me dewletê nayê baweriya me birêz Abdullah Ocalan tê.”
‘Em dixwazin Kurdî bibe fermî’
Ayşe İrmak destnîşan kir ku ew aştiyê dixwazin û wiha axivî: “Ez dixwazim jin di nav aştiyê de bijîn. Bila karên ku dixwazin bikin, jin bindest nebin ez vê dixwazim. Pêwist e aştî çêbê, her du alî jî li gorî vê tevbigerin. Em zilmê naxwazin. Îro em nikarin bi zimanê xwe bi rehetî biaxivin. Di nava jiyanê de zimanê Kurdî nayê axaftin. Zarok li derve Tirkî diaxivin û dema ku tên malê, malbatên wan jî bi wan re bi Tirkî diaxivin. Em dixwazin her kes zimanê xwe biaxive ji ber ku mirov zimanê zikmakî zêdetir dikare xwe îfade bike. Kesên Kurd bi Tirkî nikarin xwe baş bidin famkirin. Em dixwazin her kes bi zarokê xwe re Kurdî biaxive. Zimanê Kurdî divê li her derê were axaftin.”
‘Birêz Abdullah Ocalan azad bibe aştî jî dê pêk were’
Welatiyê bi navê Şehmus Guger jî da zanîn ku ew aştiyê dixwazin lê aştiyek bi derewtî naxwazin û got: “Bi gotinê her kes dibêjê aştî lê em dixwazin gotina aştiyê bibe fermî. Ev 40 sal in em dibêjin ziman, em dixwazin zimanê me bibe zimanê fermî. Me tu carî nexwestiye şer hebe. Niha jî hinek kes dixwazin em sernekevin û em zimanê xwe neaxivin. Lê em vê tiştê qebûl nakin. Em Serokê xwe dixwazin, jixwe Serokê me her tiştî nîşanî me dike. Em dixwazin dewlet gav biavêjê û Serokê me azad bibe. Em dixwazin zimanê me azad bibe, em şer naxwazin, em dixwazin azad bijîn. Ji xwe birêz Abdullah Ocalan azad bibe aştî jî dê pêk were.”
‘Aştî yek alî nabe’
Welatiyê bi navê Şehmus Kirk jî anî ziman ku ew aştiyêk dilrast dixwazin û wiha axivî: “Birêz Abdullah Ocalan ji bo aştiyê tiştên baş dibêjê. Aştî were dê ji tevahiya mirovan re baş bibe. Aştî ji her kesî re pêwist e. Niha gav avêtin dora deweletê ye. Divê li Meclisê gav werin avêtin. Aştî pêk were dê ji her du aliyan re were, aştî yêk alî nabe. Divê hemû girtî werin berdan. Em wekheviyê dixwazin, çi mafên Tirkan hebe divê mafên Kurdan jî hebin.”
