Amed – Parlamentera PDKê ya Hewlêrê ya berê Semîra Goran ku tev li Konferansa Parlamenterên Jin ên Kurd bû wiha got: “Em hemû bi aştiyê dilxweş in. Niha serdema aştî, pirrengî, xebatên civakî û qanûnî ne. Em bi birêz Abdullah Ocalan re ne, destê wî xweş ku daxwaza aştiyê dike.”
Konferansa Parlamenterên Jin ên Kurd di pêşengtiya Tevgera Jinên Azad (TJA) de di 28-29ê Gulanê de bi dirûşma “Jin siyaseta demokratîk dimeşînin, civaka demokratîk avadikin” li Çand Amedê ya li navçeya Yenîşehîr a Amedê hate lidarxistin. Aktîvîstên TJAyê di nav de gelek jinên niha parlamanter in û parlamenterên berê bûn ji çar aliyên Kurdistanê û Ewropayê tev li konferansê bûn. Parlamenter û siyasetmedarên li Rojava, Şengal û Ewropayê bi awayekî online tev li konferansê bûn. Konferans bi aşkerekirina encamnameyê bi dawî bû. Endama Yekîtiya Parlementerên Kurdistanê û parlamentera serdema sêyem a PDKê ya Hewlêrê Semîra Goran ku tev li Konferansê bû ji Ajansa Welat re axivî.
‘Em li ber destên dayikan xebatkar mezin bûn’
Semîre Goran bi lêv kir ku partiya wan Partiya Demokrat a Kurdistanê gelek gelek giringî daye jinan û wiha got: “Ji dema şoreşa Şêx Ebduselam Barzanî ve giringî daye jinan. Piştî wî Şêx Ehmed, piştî Şêx Ehmed Mela Mistefayê Nemir û piştî wî jî Kak Mesûd e. Yanî wan her tim girîngî daye rola jinan. Di gelek qanûnan de guhertin hatine kirin. Em li ber destê dayikên wisa perwerde bûne ku pêşmerge bûne, ji bo ax û welêt xebat kirine. Li Şoreşa Îlonê, li Şoreşa Gulanê, her wiha di têkbirina DAIŞê de cih girtine. Keçên me şer kirine. Dayika Helîme çar kurên wê hebûn, di Şoreşa Îlon û Gulanê de şehîd dibin, kurên wê namînin, ew dibêje çênabe ku çekên wan li erdê bimînin, dibêje bila keç û bûkên min biçin çekên wan rakin. Kak Mesûd Barzanî got heta ku em xwedan dayikeke wiha qehreman bin, Kurdistan dê tim bi ser bikeve û bigihîje armanca xwe. Yekemîn jin ku li Iraqê hate sêdarekirin, jineke Partiya Demokrat a Kurdistanê bû, Leyla Qasim bû. Daxwaz ji Leyla Qasimê kirin ku bila daxwaza lêborînê bike da ku wê sêdare nekin. Leyla Qasim ji Bûroya Siyasî ya PDKê re bersivê dişîne û dibêje ez çawa lêborînê ji partiyekê bikim ku xwînmija miletê min e. Eger ez daxwaza lêborînê bikim, ez ê ji miletê xwe daxwaza lêborînê bikim. Jina kurd xwe li ber dijmin netewandiye. Dayikan jî zarokên xwe wiha perwerde kirine.”
‘Daxwaza me yekrêzî û yekdengî ye’
Semîre Goran bi lêv kir ku piştgiriya pêvajoya heyî ya li bakurê Kurdistan û Tirkiyeyê hatiye dest pê kirin dikin û wiha berdewam kir: “Em gelek gelek piştgiriya aştiyê dikin. Em hemû dilxweş in bi aştiyê. Ji ber ku êdî serdem ne ew serdem e ku em şerê hev bikin û hev bikujin. Niha dem dema xebatên sivîl e. Niha serdema aştî, pirrengî, xebatên civakî û qanûnî ye. Daxwaza me ew e ku em hemû yekdeng bin, yekrêz bin. Em bi Birêz Ocalan re ne, destê wî xweş ku daxwaza aştiyê dike. Serok Barzanî jî piştgiriya aştiyê dike, şer naxwaze. Ji ber ku yên ku tên kuştin sivîl in. Sivîl gelek tên kuştin.”
‘Em daxwaza aştî û dîplomasiyê dikin’
Semîre Goran xwest ku her kes ji bo aştiyê yekdeng û yekrêz bin û ev tişt gotin: “Em daxwaza aştî û dîplomasiyê dikin. Em daxwaza projeyekê dikin ku yekrêziya kurd ava bike. Ez hêviya serkeftinê ji we re dixwazim û destxweşiya we dikim ji bo vê konferansê; vê konferansê kir ku em hemû jin şiyana xwe nîşan bidin, em bizanin ka şiyana me çi qas e. Kak Mesûd dibêje hûn ji xwe bawer bikin, em li pişt we ne. Eger serokek li pişt me be, wê demê em ji xwe bawer in. Niha jinên Başûr gelek jêhatî ne û gelek têdikoşin, di cihên biryardanê de ne, di hikûmetê de ne, li parlementoyê ne, dayik in, mamosta ne, pêşmerge ne, wezîr in, di sektora taybet de dixebitin, niha jin mil bi milê mêran dixebitin. Eger rola jinan ji mêran zêdetir nebe, qet jê ne kêmtir e.”
