Deseteya Perwerde û Fêrkirinê ya Rêveberiya Xweser û Wezareta Perwerdeyê ya Sûriyeyê, piştî çend civînan ku di 5-6ê hezîranê de pêk hat; ji bo ku proseya ezmûnan xwendekaran û siberoja wan li ser çend xalan li hev kirin.
Desteya Perwerde û Fêrkirinê ya Herêma Bakur û Rojhilatê Sûriyeyê û Wezareta Perwerdeyê ya Sûriyeyê, derbarê proseya ezmûnan, li ser çend xalan li hev kir.
Derbarê mijarê Desteya Perwerdeyê û Fêrkirinê daxuyaniyekî nîvsîk da.
Naveroka daxuyaniyê wiha ye:
“Ji ber berpirsiyariya me ya hevbeş ji bo xurtkirina proseya perwerdeyê û misogerkirina mafên xwendekaran li hemû herêmên Sûriyayê û li ser bingeha prensîbên hevkarî û yekbûnê di navbera saziyên perwerdeyê de, Desteya Perwerde û Fêrkirinê ya Bakur û Rojhilatê Sûriyayê û Wezareta Perwerdeyê ya Sûriyeyê, piştî çend civînan ku di navbera 5-6ê hezîrana 2025an de lidar ketin, ji bo ku proseya ezmûnan bi rêk û pêk bi rê ve biçe û xizmeta berjewendiyên xwendekaran û siberoja xwendina wan bike, li ser van xalan li hev kir:
Paşxistina ezmûnên qonaxa navîn ji dîroka 14.06.2025 bo dîroka 21.06.2025.
Avakirina komîteyên hevbeş ên demkî ji bo çavdêriya rêvebirina ezmûnan li Bakur û Rojhilatê Sûriyayê û mîsogerkirina destpakî û pisporiyên di rêvebirina ezmûnan de.
Vekirina navendên hevbeş ên demkî ji bo pêşwazîkirina xwendekaran ji herêmên cuda û hêsankirina kar û barê qeydkirina wan li gor pîvanên perwerdeyê yên pejirandî.
Qeydkirin ji dîroka 11.06.2025 destpê dike heta dîroka 17.06.2025.
Hêsankirina veguhestina qeydkirinê ji bo xwendekarên ku li derveyî Bakur û Rojhilatê Sûriyayê qeydkirî ne û misogerkirina mafê wan ê beşdarbûna ezmûnan bê astengî.
Li 6 bajarên mezin ên 5 kantonan: Qamişlo, Hesekê, Reqa, Dêrazorê, Tebqa, û Kobanê (Sirîn), ezmûn bên çêkirin ku şert û mercên lojîstîkî baş bin û xwendekar bikarin bi awayekî hêsan xwe bigihînin navendên ezmûnan.
Ev daxuyanî pabendbûna me ya ji bo dabînkirina hawîrdoreke perwerdeyê ya aram û ewle ji bo hemû xwendekarên sûriyeyî nîşan dide, her wiha pabendbûna me ya ji bo xebata hevbeş ji bo başkirina proseya perwerdeyê li herêmên cuda piştrast dike.”
