Rayedarên Parastina Sivîl a Xezeyê ragihandin ku roja Çarşemê artêşa Îsraîlê gule berdane ser sivîlan ku ji bo wergirtina alîkariyê di rêzê de bûn û herî kêm 31 kes hatine kuştin û 200 kes jî birîndar bûn e.
Li gorî daxuyaniya rayedarên Parastina Sivîl a Xezeyê; li Korîdora Netzarimê dijî girseya gel gulebaran hate kirin. Hat zanîn ku gel ber bi navenda alîkariyê ya saziya bi navê Gaza Humanitarian Foundation (GHF) ve diçû.
Berdevkê Parastina Sivîl Mahmûd Bassal daxuyanî da AFPê û got: “Bi tank û amûrên hewayî yên bêmirov gule li hezaran sivîlan hate barandin ku dixwestin alîkariya xwarinê werbigirin. herî kêm 31 kes şehîd bûn, 200 birîndar jî rakirin nexweşxaneyan.”
Li gorî Bassal bi hezaran Fîlîstînî bi şev li hev kom bûbûn, ji bo karibin xwe bigihînin navenda alîkariyê ya GHFê. Serê sibehê saet di 05:30î de jî bi tankan her wiha bi droneyan êrîşeke giran li sivîlan hate kirin.
DEM Partî: Şerma mirovahiyê û dîrokê ye
DEM Partiyê komkujiyê şermezar kir û got: “Bi êrişa li ser sivîlên ku li Korîdora Netzarim a li Xezeyê li benda alîkariya mirovî ne, Îsraîlê careke din ne tenê qanûna navneteweyî, lê di heman demê de rûmeta mirovan jî binpê kiriye.
Gulebarankirina gelê ku mehkûmî birçîbûnê hatiye kirin, sûcdariya herî mezin a dîrokî ye. Ev ne tenê sûcê şer e, di heman demê de yek ji gunehên herî hovane yên dîroka mirovahiyê ye. Bêdengiya cîhanê ya li hemberî vê hovîtiyê şermek mezin e!”
