Rêxistina DEM Partiyê ya Amedê ku têkildarî Roja Têkoşîna li Dijî Karkeriya Zarokan li avahiya xwe daxuyanî da damezrandina komîsyona xwe ya zarokan ragihand.
Rêxistina Partiya Wekhevî û Demokrasiyê ya Gelan (DEM Partî) a Amedê têkildarî 12ê Hezîranê Roja Têkoşîna li Dijî Karkeriya Zarokan li avahiya xwe ya li navçeya Peyas a Amedê daxuyanî da çapemeniyê û Komîsyona Zarokan a DEM Partiyê ya Amedê ragihand. Hevberdevka Komîsyona Zarokan a DEM Partiyê Berîtan Guneş Altin, Hevseroka DEM Partiyê ya Amedê Gulşen Ozer, Hevberdevkên Komîsyona Zarokan a DEM Partiyê ya Amedê Necla Korkmaz û Mazlûm Dogan tev li daxuyaniyê bûn.
Civakeke azad zarokên azad bi xwe re tîne
Di daxuyaniyê de ewilî Hevseroka DEM Partiyê ya Amedê Gulşen Ozer axivî. Gulşen Ozer diyar kir ku civakeke azad zarokên azad bi xwe re tîne û wiha got: “Ev şerê 52 salan berdewam dike bandorê li zarokan jî dike. Ji ber vê yekê me weke DEM Partiyê me got heke em ji zarokan dest pê nekin dê kêm bimîne.”
160 milyon zarok kirine karker
Hevberdevka Komîsyona Zarokan a DEM Partiyê Berîtan Guneş Altin, diyar kir ku di sala 23yemîn a Roja Zarokan de 160 milyon zarok kirine karker û bi şert û mercên zor de tên xebitandin û wiha got: “Ji 160 milyon zarokan 79 milyon zarok di karen giran de dixebitin. Sedemê vê yeke yê bingehîn xizanî, şer, dûrkirina zarokan a ji perwerdehiyê û pergala kapîtalîst a zarokan weke hêza kar a erzan dibîne ye. Li Tirkiyeyê jî 869 hezar zarok kirine karker. Ev ne tabloya rast e. Karkerên demsalî û zarokên li MESEMan di nava van reqaman de nînin. Dema em van jî lê zêde bikin nêzî milyon û nîv, du milyon xebatkarên zarok hene. Em meha havînê jî lê zêde bikin ev hejmar digihe çar milyonan.”
Bajarên ku kurd lê dijîn di xizaniya zarokan de di rêza yekemîn de ne
Berîtan Guneş Altin da zanîn ku li cîhanê ji 10 zarokan yekê dikin karker, li Tirkiyeyê ev rêje ji 5 zarokan yek e û anî ziman ku di navbera salên 2013 û 2024an de li Tirkiyeyê 742 zarokan jiyana xwe ji dest dane. Berîtan Guneş Altin, bi lêv kir ku ji her 4 zarokan yek bi awayekî birçî diçe dibistane û anî ziman ku Şirnex, Mêrdîn û Amed di xizaniya zarokan de di rêza yekemîn de ne. Berîtan Guneş Altin da zanîn ku bajarên ku kurd lê dijîn di xizaniya zarokan de di rêza yekemîn de ne û wiha domand: “Bi kedxwariyê, şer, newekheviyê li bajarên kurdan zarok bêtir xizan dibin.” Berîtan Guneş Altin diyar kir ku ji bo zarokan di aştiyê de israr dikin û ji ber vê yeke komîsyona zarokan deklere dikin.
Necla Korkmaz a dû re metnê daxuyaniyê xwend di destpêka axaftina xwe de hemû zarokên ku di çerxa kedxwariyê de jiyana xwe ji dest dane bi bîr anîn û wiha got: “Komîsyona Zarokan a Navendî ya Partiya Demokrat di vê qonaxa dîrokî ya veguherîna civakî de, bi prensîba ku zarok bibin kirdeya civakî dişopîne ku di hawîrdorek azad, wekhev û bê îstismar de bijîn û beşdarî hemî warên jiyana hevpar bibin.
Meclisa armanc dike ku mafê bingehîn ên zarokan biparêze
Di vê çarçoveyê de, Komîsyona Zarokan a DEM Partiyê ya Amedê ku me îro damezrandina wê îlan kir, armanc dike ku mafên bingehîn ên zarokan ên wekî jiyan, perwerde, tenduristî, edalet, beşdarbûn, stargeh û ewlehiyê biparêze û mekanîzmayên qanûnî û civakî ji bo jiholêrakirina her cûre îhmalkirin, îstîsmar, tundî û îstismara li dijî zarokan ava bike û xurt bike.”
‘Dê ji bo civakeke demokratîk têbikoşin’
Necla Korkmaz ku daxwazên Meclisa xwe rêz kirin destnîşan kirin ku bi taybetî ji bo zarokên ku mafê wan ê jiyanê ji wan hatiye standin, rastî her cûre îhmal, îşkence û tundiyê hatine, xizan bûne û kirine karker, îstismar kirine, kirine penaber, ji azadiya xwe mehrûm bûne, ji ber cudakariya rastî cihekariya sîstematîk hatine û îradeya wan hatiye paşguhkirin û bêrêzî lê hatiye kirin, dê bi zarokan re, ji bo avakirina jiyaneke aştî lê hebe û civakeke demokratîk têbikoşin.”
