Bi pêşengiya Şaredariya Peyasê yekemîn civîna atolyeya jinan hat lidarxistin û peyama “Em ê bi hev re bifikirin, hilberînin û bi hêztir tevbigerin” dan.
Civîna destpêkê ya atolyeya bi navê “Ji Zanatiya Kevn Ber bi Jiyana Azad Ve” ku ji aliyê Gerînendetiya Polîtîkayên Jinan a Şaredariya Peyasê ve hat organîzekirin, li Pirtûkxaneya Hilberînên Jinan a Peyasê pêk hat. Di komxebata yekemîn a bi sernavê “Zayendiya Civakî” de, jinan bi beşdariyeke berbiçav li ser mijarên girîng nîqaş kirin.
Di civînê de Hevşaredara Peyasê Bêrîvan Gulşen Sîncar, cîgirên hevşaredar û gelek aktîvîstên rêxistinên jinan amade bûn. Panelîst Rojda Yildiz ku di destpêka civînê de axivî, zanîn û tecrubeyên xwe yên derbarê “Zayendiya Civakî” bi beşdaran re parve kir.
‘Em ê bi hev re bi hêztir bibin’
Yildizê, di bin sernavên girîng de, li gorî serpêhatiyên dîrokî û şertên heyî, rolên jinbûn û mêrbûnê yên ku di civakê de hatine avakirin, rave kir. Wê di axaftina xwe de bal kişand ser girîngiya tevkariya jinan bi mînakên ji jiyana rojane û wiha got: “Jin bi tecrubeyên xwe yên rojane tevkariyê li jiyanê dikin û bi vî awayî qadeke hevpar a hêzdar diafirînin. Em ê bi hev re bifikirin, hilberînin û bi hêztir tevbigerin.”
Civîna yekemîn a komxebatê bi pirsên beşdaran û bersivên înteraktîf bi dawî bû. Armanca rêzeya komxebatan a “Ji Zanatiya Kevn Ber bi Jiyana Azad Ve” ew e ku di mijarên civakî de hişyariyê zêde bike û bi hêzkirina jinan re bibe alîkar.
