Desteya Çandê ya Rêveberiya Xweseriya Demokratîk a Herêma Bakur û Rojhilatê Sûriyeyê, piştî xebata 18 mehan li parka avahiya desteyê ya Reqayê mûzexaneya belgekirina sûcên DAIŞê vekir. Hevserokatiya Desteya Çandê ya Bakur û Rojhilatê Sûrî Serfiraz Şerîf got: “Armanca vê muzeyê pêşkêşkirina belgeyê sûcê îşkenceyê yên DAIŞê ne. Muze belgeyên sûcên DAIŞê nişan dide.”
Di muzeyê de 100 wêneyên ku sûcên DAIŞê belge dike hene. Bi vê muzeyê dixwaze sûcê DAIŞê raberî gelê Bakur û Rojhilata Sûriyê bike.
Di ser rizgarkirina Reqayê re nêzî 7 sal borîn. DAIŞê bajarê Reqayê ji bo xwe wekî paytext îlan kiribû. Di encama şerê dijwar ê HSD, YPJ û YPGê yê li dijî DAIŞê de bajarê Reqayê ji DAIŞê hat paqijkirin. Di vê pêvajoyê de endamên DAIŞê li heremê tev li gelek binpêkirinên mezin ên mirovan bûn. Ev binpêkirin bi belge, dîmen û wêneyan derketin holê. Desteya Çandê ya Rêveberiya Xweseriya Demokratîk a Herêma Bakur û Rojhilatê Sûriyeyê, ji bo îşkenceya ku DAIŞê li welatiyan kiriye û kiryarên wan li pêş çavê cîhanê raxe, piştî xebata 18 mehan li parka avahiya desteyê ya Reqayê mûzexaneya belgekirina sûcên DAIŞê vekir. Di mûzexaneyê de 100 wêneyên bi baldarî hatine hilbijartin û ji nava hezaran belgeyên bi zehmetî hatine bidestxistin, hene. Ev wêne li ser tevlêkirina zarokan bi darê zorê di nava çeteyan de û perwerdekirina wan li ser darvekirina meydanî, ne. DAIŞê hem îşkenceya giran li mirovan kir û bi awayekî li dijî pîvanên mirovahiyê mirov kuştin, li aliyê din gelek şûnwar talan kirin.
Hevserokatiya Desteya Çandê ya Bakur û Rojhilatê Sûrî Serfiraz Şerîf têkildarî armanc û naveroka muzeyê ku ji belgeyên DAIŞê pêk tê ji Ajansa Welat (AW) re axivî. Serfiraz Şerîf, anî ziman ku armanca vê muzeyê pêşkêşkirina belgeyê sûcê îşkenceyê yên DAIŞê ne û wiha got: “Çeteyên DAIŞê gelek rêbazên darvekirina hovane wekî çarmîxkirin, şewitandin û xeniqandin bi kar dianîn. Ev yek li Çarxerêya Neîm ku bi Çerxerêya Cehîm dihat naskirin pêk dihat. DAIŞiyan di rojekê de 80 serî li wê çarxerêyê daliqandibûn.”
Di muzeyê de binpêkirinên DAIŞê danîn holê
Serfiraz Şerîf destnîşan kir ku armanca sereke ya muzexaneyê ev e ku binpêkirinên DAIŞê yên li dijî hemû pêkhateyên Bakurê Rojhilatê Sûriyeyê bên dîtin û zanîn û wiha got: “Ji bo hemû gelê Bakur û Rojhilatê Sûrî van kiryarên DAIŞê bibîne û fêr bibe, belgeyên li vê muzexaneyê her tiştî nîşan dide. Zêdeyî salekê belge û wêneyên ku îşkenceya DAIŞê belge dike hatin komkirin. Me hemû belgeyên ku binpêkirinan vedibêjin kom kirin. Me belge hem li ser malperên çapmeniyê, hem li ser parvekirinên medya dijîtal û hem jî şopên ku di nava bajaran de mabin kom kir. Ev karekî pir rast û girîng bû. Pêbaweriya van belgeyan muhîm e. Di vê muzeyê de
belge, wêneyên îşkence û darvekirinê û sûcên şênber hatine parvekirin.”
Serfiraz Şerîf da zanîn ku sedema vekirina muzeyê li Reqayê hebûna serokatiya Rêveber a li Reqayê ye. Ji bilî vê yekê bajarê ku bûye sembola sûcên îşkenceyê yên DAIŞê Reqa ye. Di muzeyê de alavên dervekirinê hene. Ji wan biryarnameyan ferzkirina nimêjê, girtina dikanan û darvekirina kesên dijber, veguherandina dibistanan bo dîwanên şerîetê, rakirina meteryalên perwerdehiyê bi hinceta ku dijî şerîeta îslamiyê ne, hene. Bi vê muzeyê em dixwazin berxwedana xelkê Reqayê û fedakariyên Hêzên Sûriya Demokratîk (QSD) û Yekîneyên Parastina Jin (YPJ) bên dîtin e.”
Eleqeya muzeyê zêde ye
Mûzexaneyê şandeyên ji hundirê Sûriyeyê, tûrîzmên ji Amerîka, Çîn û Singapore pêşwazî kir. Gelek şandeyên din jî ji derve hatin dîtina muzeyê.
