Şaxa ÎHDê ya Şirnexê kongreya xwe pêk anî Ayşegul Dogan di kongreyê de got ku rêya aştiyê gelê me vekiriye.
Şaxa Komeleya Mafên Mirovan (ÎHD) a Şirnexê bi tevilbûna Berdevka DEM Partiyê Ayşegul Dogan, rêxistinên DEM Partî û DBPê yên Şirnexê, endamên TJAyê û dayikên aştiyê, serok û endamên Baroya Şirnexê û gelek welatî tevlî 4emîn kongreya xwe ya asayî pêk anî.
Di kongreyê de Hevserokê Şaxa İHDê ya Şirnexê Haşim Togurlu axaftin kir. Togurlu anî ziman ku wan kongreya xwe diyarî aştiya civakî kiriye û wiha berdewam kir; “Li welatê şerek heye û ji ber vê yeke binpêkirina mafên mirovan pêk tê.” Berpirsyarê ÎHDê yê herêmê Tahîr Saçakli jî ani ziman ku di vê pêvajo aştî û civaka demokratik de barek giran dikeve ser milê ÎHDê.
Berdevka DEM Partiyê Ayşegul Dogan da zanîn ku xebata ÎHDê xebatek gelek pîroz e û ev tişt gotin; “Salên gelek tarî me derbas kirin. Di destpêka xebatên ÎHDê de gelek zehmetî hatin kişandin. Xebatkarên destpêkê yên ÎHDê cudakarî nedixist navbera êşa tu kesî. Di xwişk û biratiyê de yek serdest yek bindest be ev yek ne xwîşk û biratiye. Ger îro em bikaribin li vir biaxivin ev yek bi saya Vedat Aydin û Orhan Doganan e. Komeleya Mafên Mirovan îro gehîştibe vê astê bi saya cangoriyên parazvanên mafên mirovan e.”
Dogan li ser pêvajoyê jî destnîşan kir ku Şirnex awêneya şer û aştiyê ye û axaftina xwe wiha bi dawî kir; “Li vî welatî şerek qewimî û awêneya vî şerî jî îro bajarê em lê Şirnex e. Her wiha awêneya aştiyê jî Şirnex e. Derbarê pêvajoyê de guman zêde ne, gel dibêje gelo çi dibe, çawa dibe. Kesên ku ji me re aştiyê bîne tuneye. Em weke gel dê bixebitin û aştî û demokrasiyê bidest bixin. Me heya îro zordarî li tu kesê nekiriye û em destûrê nadin ku tu kes û hêz mafên me yên mirovî binpê bike. Divê em êdî ji bo aştiyê û jiyanek bi rûmet şêwaza tekoşîna xwe biguhere. Rêyek bi qedr û qîmet vebûye û ev rê bi berxwedana gelê me hatiye vekirin. Divê em îro wê rêyê baştir vekin û ew rêya hatiye vekirin xweştir bikin.”
Piştî axaftinan rapora xebat û aboriyê hat xwendin û piştre rêveberiya nû hate hilbijartin. Rûken Ustun û Şivan Sakman weke hevserok hatin hilbijartin.
