Parlamentera DEM Partiyê ya Mûşê Sumeyye Boz di mihrîcana Çand û Xwezaya Jinê ya li Gimgimê de axivî û got: “Em dibêjin ‘Jin, Jiyan, Azadî’ û li cihê Ekîn xistin erdê em radibin ser pêyan.”
Li navçeya Gimgimê ya Mûşê bi dirûşma “Bi jina azad, bi xweza û çandê ber bi civaka demokratîk ve” “Mihrîcana Çand û Xwezaya Jinê” dest pê kir. Mihrîcan dê du rojan bidome. Mihrîcanê ji bo Kader Kevser Elturk (Ekîn Wan) a di 10ê Tebaxa 2015an de li Gimgimê hate kuştin û bedena wê hatibû teşhîrkirin û hemû jinên hatine kuştin, bi meşeke girseyî dest pê kir. Hevseroka Giştî ya DBPê Çîgdem Kiliçgun Uçar, Wekîla DEM Partiyê ya Mûşê Sumeyye Boz, aktîvîsta TJAyê Ayla Akat Ata û bi sedan jin beşdarî meşê bûn. Jinan di meşê de pankartên “Jin, jiyan azadî” û “Kedxwarî di aqilê zilam de ye, rizgarî di jin û xwezayê de ye” hilgirtin. Di meşê de gelek caran dirûşmên “Bijî Serok Apo”, “Jin, jiyan, azadî” û “Jin dimeşe, erd û ezman diheje” berz kirin.
Parlamentera Mûşê Sumeyye Boz piştî meşê axivî û bal kişand ser teşhîrkirina bedena Ekîn Wanê û wiah got: “Dema me li wî wêneyî nihêrtî me ne şerm, berxwedan dît. Me ne kesên ew teşhîr kirî, îradeya Ekîn Wanê li dîrokê nivîsand. Ji ber ku em li dijî şerên ser bedena jinê tên kirin, jiyan û azadiyê diparêzin.”
Sumeyye Boz, da zanîn ku fihûş, torên tiryakê, cînayetên jinan û qirkirina xwezayê parçeyeke stratejiya şerê taybet e ku ji hêla heman navendê ve tê birêvebirin wiha bi dawî kir: “Em jin dê bi perspektîfa Jineolojiyê û bi kevneşopiya tevgera jinên Kurd van polîtîkayan teşhîr bikin. Em ji bo birêxistinkirina têkoşîna jinan li vir in. Em îro li vir ne tenê ji bo mezinkirina hêrsa xwe, her wiha ji bo birêxistinkirina têkoşînê li vir in. Em dibêjin ‘Jin, jiyan, azadî’ û li cihê Ekîn xistibûn erdê em radibin ser pêyan. Ji bo Gulistan û Rojîn, ji bo hemû jinên tune hatine hesibandin em ê tu caran dev ji lêgerîna xwe ya edaletê bernedin.”
Jin piştî daxuyaniyê, derbasî qada mihrîcanê bûn.
