Rojnameger Mazlum Erencî di 14emîn salvegera xwe de li ser gora xwe hat bibîranîn. Dayika wî Remziye Erencî diyar kir ku têkoşîna kurê wê bi aştiyek birûmet tacîdar bibe.
Rojnameger Mazlum Erencî di 29ê hezîrana 2011an de li çoltera Çemîşgezekê ya Dêrsimê di pevçûnekê de jiyana xwe ji dest da, li ser gora xwe ya li Goristana Yenîkoyê ya navçeya Rezanê ya Amediyê hat bibîranîn. Malbata Erenciî û gelek rojnameger beşdarî bîranînê bûn. Dayika wî Remziye Erencî derdora gora Mazlum bi benên kesk, sor û zer xemiland.
Bîranîn bi deqeyek rêzgirtinê destpê kir, Hevserokê Komeleya Rojnamegerên Dîcle Firatê Selman Çîçek axivî û diyar kir ku ew şahidê berxwedana Erencî ye û wiha got: “Ew kesayetekî ku mirov nikare bigotinan bîne ziman, ew pir biqîmet e. Wî her tim rojname ji me re dianî. Wî pêşengiya kevneşopiya çapemeniya azad kir. Wî rêya xebata çapemeniya azad nîşanî me da. Wekî şopînerên wî em ê têkoşîna wî bidomînin. Em ê pênûsa Cîhan, Nazim û çapemeniya azad li erdê nehêlin.”
Dayik wî Remziye Erencî diyar kir ku têkoşîna kurê wê bi aştiyek birûmet tacîdar bibe û ev tişt anî ziman: “Xwîna kurê min û hemû hevalên wî li erdê nema Bi têkoşîna wan dê aştiyeke birûmet pêk were. Bi hezaran şehîdên me yên wekî wî hene. Ew hemû Mazlumê min in. Min hemû êşa wan wekî êşa Mazlum hîs kir. Em bi têkoşîna wan hatine heta vê rojê. Şehîd namirin.”
Piştî axaftinan, qurnefîlan danîn ser gora Erencî.
