Hevseroka Giştî ya DEM Partiyê Tulay Hatîmogûllari bi Serokê Giştî yê CHPê Ozgur Ozel re hevdîtin kir û got: “Qeyum derbeyeke li dijî vîna gel e.”
Hevseroka Giştî ya Partiya Wekhevî û Demokrasiyê ya Gelan (DEM Partî) Tulay Hatîmogûllari û şandeya pê re çûn li Navenda Giştî ya (CHP) û bi Serokê Giştî yê CHPê Ozgur Ozel re hevditin kir. Piştre daxuyanî dan. Ewil Tulay Hatîmogûllari axivî û bal kişand ser girtin û binçavkirin û got: “Derbeyeke li dijî vîna gel e” û xwest kesên hatine binçavkirin zû bên berdan. Tulay Hatimogullari wiha axivî: “Bi taybet jî dixwazim bibêjim ku ev operasyon, operasyoneke siyasî ye. Nexwe heke îdiayeke nelirêtiyê hebe, heke di vê mijarê de di destê wan de delîl hebin, dikarin hinek lêpirsînan bidin destpêkirin. Bila komîsyonek were avakirin, daraza serbixwe bikeve dewrê û ne tenê şaredariyên muxalefetê, her wiha der heqê şaredariyên îktîdarê de jî lêpirsînê bide destpêkirin. Em pêşniyar dikin ku vê lêpirsînê der heqê şarededariyên qeyûm lê hatine tayînkirin jî bikin. Dema em li raporên Dîwana Çavdêriya Darayî dinêrin, dibînin ku qeyûman çiqas nelirêtî kirine. Şaredar, ji hêla gel ve hatine hilbijartin û ev operasyon tenê nayên wateya girtina hevşaredarekî. Her wiha tunehesibandina tevahiya hilbijêr û dînamîkên wî bajarî ye. Tunehesibandina mafê bijartin û hilbijartinê ye. Lewma divê tavilê dev ji van sepanên dij-demokratîk berdin. Mimkin nîne em qebûl bikin. Em careke din bang dikin, tavilê dev jî vî mejiyê van operasyonan dikin berdin. Bila hemû şaredar û kesên hilbijartî yên di van operasyonan de hatine girtin û binçavkirin bên berdan. Em careke din hestên xwe yên piştevaniyê parve dikin.”
Ozel: Hemû qeyûm siyasî ne
Serokê CHPê Ozgur Ozel jî anî ziman ku ev operasyonên siyasî ne û wiha axivî: “Birêz serok bi bîr xist. Wan gelek ji qeyûman kişand. Bi qasî dinyayekê qeyûm tayîn kirin. Tayyîp Beg wê demê derdiket pêşberî televîzyonan û digot ‘Ev pereyan ji rêxistina terorê re dişînin lewma hatine binçavkirin.’ Bawer bikin li vir mesele, êrişa lidijî mafê bijartinê ya hilbijêrên Kurd e. Niha ev pêvajo dest pê kir û Tayyîp Beg çi got. Got ku dê sepana qeyûman îstîsnaî be. Ev tê wê wateyê ku tevahiya qeyûmên berê hatin tayînkirin, tayînên siyasî bûn. Heke DEM li dijî van operasyonan bertekê nîşan bidin dê li dijî DEMê û heke nîşan nede jî dê peyameke cuda bidin civaka Tirkiyeyê.”
