Amed – Dengbêjên li Mala Dengbêjan a li Amedê klaman dibêjin têkildarî banga Rêberê Gelê Kurd Abdullah Ocalan û çek şewitandina PKKê wiha gotin: “Em ji Tayîp Erdogan û Devlet Bahçelî dixwazin ku çawa Serok Abdullah Ocalan gav avêt ew jî gav biavêjin.”
Banga bidîmen a Rêberê Gelê Kurd Abdullah Ocalan, di 9ê Tîrmehê de hate weşandin. Abdullah Ocalan, di banga xwe de ev yek destnîşan kir: “Qonaxa em gihiştinê me neçar dike ku bi gavên nû re em bikevin nava pratîkê. Ez ne bi hêza çekê lê bi hêza siyaset û aştiya civakî bawerim. Û bang li we jî dikim ku hûn jî vê rêgezê bixin meriyetê.” Piştî vê bangê Koma Aştî û Civaka Demokratîk a PKKê ku ji 30 kesan pêk dihat, di 11ê Tîrmehê de li Şikefta Casenê ya li çolterê bajarê Silêmaniye ya Herêma Kurdistanê bi merasîmekê çek û rextên xwe şewitandin.
Dengbêj Yûsûfê Gocxwarî, Dengbêj Seyfedînê Kufercin, Dengbêj Neytûllahê Mecnesarî û Mistefayê Botî ku li Mala Dengbêjan a Amedê klaman dibêjin têkildarî banga Rêberê Gelê Kurd Abdullah Ocalan, şewitandina çekan a PKKê û pêvajoya heyî ji ajansa me re axivîn.
‘Em dijminatiya kesê naxwazin xwişk û biratî dixwazin’
Dengbêj Yûsûfê Gocxwarî (Yûsûf Mizrak) destnîşan kir ku ev pêvajo bibe wesîleya aştî û xwişk û biratiyê û wiha got: “Serok Apo ji bo şexsê xwe gav neavêt. Êdî bes e. 40 sal in ev têkoşîn tê dayîn. Ziman, çand, huner, dîrok û mafên me jî hene. Em naxwazin kuştin çêbibe. Bila xwişk û biratî be. Vê dewleta Komara Tirkiyeyê Tirkan û Kurdan bi hev re bi dest xistiye. Em xwişk û biratî dixwazin dijminatiya kesê naxwazin. Em dixwazin aştî, xwişk û biratî çêbibe. Dilê dayikan neşewite.”
‘Bila Yekbûnî û xwişk û biratî çêbibe’
Yûsûfê Gocxwarî, destnîşan kir ku piştî şewitandina çekan divê dewleta Tirk jî gavan biavêje û wiha domand: “Dema Tirk jî weke me gav biavêjin yekbûniyek çêdibe. Bi xapandinê nabe. Dema xayîntî hebe naçe serî çênabe. Êdî bes e bila kes neyê kuştin. Em ji Tayîp Erdogan û Bahçelî jî dixwazin ku çawa Serok Abdullah Ocalan gav avêt ew jî gav biavêjin. Bila yekbûnî, xwişk û biratî û aştî çêbibe.”
‘Xwezî ev şer zûtir hatibûya sekinandin’
Dengbêj Seyfedînê Kufercin (Seyfettîn Soyler) jî diyar kir ku daxwaza wan ew bû şer zûtir were sekinandin mirov nehatibûna kuştin û wiha axivî: “Lê belê bawer im ev kesên ku çekên xwe difiroşin kara wan di vî şerî de heye. Kesên ku naçin şer û nayên kuştin xwediyê dewletê ne. Em dibêjin bes e bila ne laz, ne çerkez, ne faris, ne ereb, ne tirk û ne jî kurd bên kuştin. Dema mirov ji aliyê îslamî jî dinirxîne dibêjin ‘dema kesekê du mirov li hev anîn weke rojî û nimêjê bixêr e’ Vêca mirov du gelan an 10 gelan li hev bîne xêra wê nayê hesab. Berê jî pêvajoyên wiha çêbûn lê hinekan xera kirin û bûn sedemê şer, kuştin û qetlan.”
‘Divê Serok dan û standinê bike ku aştiyê pêk bîne’
Dengbêj Seyfedînê Kufercin bi lêv kir ku bi pêvajoya aştiyê keyfxweş in û wiha berdewam kir: “Lê Serok hêj li pişt derî ye. Divê Serok li cihekî ku gel bikare biçe pê re biaxive bibe dan û standinê bike ku aştiyê pêk bîne. Ji aliyê din gavek hêj nehatiye avêtin gotin hene lê kirin tune ye. Em dixwazin ku kirin hebe. Duh 30 keç û xortên me hatin çekên xwe şewitandin û gotin êdî bes e. Kurd bi agirê Newrozê çûn serê çiya dîsa bi agir hatin xwarê. Hêvî dikin ev dawî be. Ji ber vê yekê dilê me gelekî xweş bû. Bes e bila kes neyê kuştin. Em tev weke hev in, wekheviyê dixwazin. Em bawerin ku dê aştî jî çêbibe. Bila ev şerê qirêj biqede. Heke aştiyek çêbibe em hemû dê rehet bin.”
‘Divê dewlet jî gavan biavêje’
Dengbêj Neytûllahê Mecnesarî (Neytûllah Sayîlî) jî têkildarî pêvajoya heyî ev tişt gotin: “Qasî dinyayê keyfa min hat. Ev qetil hate sekinandin. Hêvî dikin ew ê pêvajo wiha berdewam bike, dayik negirîn dile dayikan neşewite. Kesên ku bûne wesîleya vê pêvajoyê Xwedê ji wan razî be. Bila aştî û xwişk û biratî pêk were. Divê dewlet jî gavê biavêje. Divê bi hev re gav bên avêtin.”
‘Xwîn bi xwînê nayê paqijkirin’
Dengbêj Mistefayê Botî (Mûstafa Ogûz) ku bal kişand ser pêvajoyê, anî ziman ku xwîn bi xwînê nayê paqijkirin û wiha got: “Gelê Kurd gaveke gelek baş avêt. Kî dixwaze biçe serê çol û çiyan. Wateya çek şewitandinê ew e ku dibêjin ‘em êdî şer naxwazin pêvajoyeke siyasî dixwazin, vaye me gav avêt bila dewlet jî gavê biavêje.’ Partiya me ji bo komîsyonê serî li Meclisê daye. Divê komîsyon bê avakirin û qanûnan çêbikin. Kesên ku tev li komîsyonê nebin demek şer dixwazin. Heta bila referandum were kirin. Kî şer dixwaze kî aştiyê dixwaze. Divê dewlet jî gavê biavêje. Weke birêz Bahçelî got çûk bi yek baskî dibe? Nabe.
