Alî Koç ê ku piştî 34 salan duh ji Girtîgeha Karabukê hatiye berdan li Amedê bi awayekî girseyî hate pêşwazîkirin. Alî Koç ku di pêşwazîkirinê de axivî, wiha got: “Azadiya hevalên me yên li zindanê û azadiya Rêbertiyê erka me ye.”
Alî Koç ê ku di sala 1992yan de li Amedê hatibû girtin û nêzî 34 salan li girtîgehên cuda dihate ragirtin, duh ji Girtîgeha Tîpa T a Karabukê hate berdan. Alî Koç ê ku berdana wî ji aliyê Desteya Rêveberî û Çavdêriyê ya Girtîgehê ve ve çar caran hatibû taloqkirin, li kêleka Petrola Geterler a navçeya Rêzan a Amedê bi awayekî girseyî hate pêşwazîkirin. Di pêşwazîkirinê de rêveberên Komeleya Alîkarî û Piştevaniya bi Malbatên Girtî û Hikumxwaran re (TUHAY-DER) ya Amedê, nûnerên saziyên sivîl ên civakî, malbat û xizmên wî amade bûn. Li Amedê bi dirûşmên “Bijî berxwedana zindanan” û bi tilîliyan hate pêşwazîkirin.
‘Dema hevalên me hatin berdan dê xwe azad hîs bikim’
Alî Koç ku di dema pêşwazîkirinê de axivî, wiha got: “Demeke dirêj ez di zindanê de mam, li zindanê hîn jî hevalên me hene, dilê min li zindanê ma. Heta ku hevalên me yên di zindanê de dernekevin, ez ê xwe azad hîs nekim. Azadiya hevalên me yên li zindanê û azadiya Rêbertiyê erka me ye. Ez hêvî dikim ku em ê bi mil dayîna hev, wan jî azad bikin.”
Alî Koç ê ku ji aliyê Dadgeha Ewlehiya Dewletê (DGM) ve di sala 1992yan de cezayê muebedê lê hatibû birîn bi rêzê li Girtîgehên Amed, Dîlok û herî dawî jî li Karabukê hate ragirtin.
