Stenbol – Dengbêj Kazo ê ji prostata xwe emeliyat bûye û ji nexweşxaneyê derketiyê ji her kesekê re silav û rêzên xwe şandin û got: “Ez masî me, gel behr e. Ez nikarim bê gel bim. Bê gel nikarim bijîm. Xwîn, jiyan û dengê xwe ez ê bidim gelê xwe.”
Hunermend Dengbêj Kazo piştî emeliyata prostatê ji nexweşxaneye lê dihat dermankirin derket. Gelek kes ji bo serdanê berê xwe da li nexweşxaneyê. Dengbêj Kazo ê di huner û muzîka Kurdî de xwedî kedeke cihê ye piştî ji nexweşxaneyê derket ji ajansa me re axivî.
‘Hunermend pira xwişk-biratiyê ava dikin’
Dengbêj Kazo diyar kir ku ew gelek gelek baş e û wiha axivî: “Mirovên ku wekî me li cîhanê tên naskirin, dibin şirîkê êşê. Ev 4 roj bûn li nexweşxaneyê bûm. Gelek kesan serdena min kir û li min geriyan, piştgirî dan min. Ez gelek keyfxweş bûm. Hunermend pira xwişk-biratiyê û yekîtiyê ava dikin. Ji me re yekîtî û yekîtî. Divê em ji hev hez bikin. Heta ku em ji hevdu hez nekin, em nagihijin qada mirovatiyê.”
‘Xwîn, jiyan û dengê xwe ez ê bidim gelê xwe’
Di dawiya axaftina xwe de Dengbêj Kazo destnîşan kir ku jinûve lihevhatina gel di dilê wî de ye û got: “Heta ku xwîn di bedena min de bimîne, ew e gelê bin be. Bi qasî ku ji me werê divê em di nexweşiyê de jî bibêjin, ‘xweşî hebe’. Lê em ê di nexweşiyê de jî berdewam bikin. Di demên pêş de ez ê dîsa werim pêşberî gelê xwe. Em ê dîsa di nava gel de bin. Jiyana min gel e. Ez masî me, gel behre, ez nikarim bê gel bim. Bêyî gel nikarim bijîm. Ez ê xwîn, jiyan û dengê xwe bidim gelê xwe.”
Derbarê Dengbêj Kazo de
Dengbêj Kazo di sala 1950an de li gundê Ermanisa ya Wanê hate dinê. Ji ber kal û bavê wî dengbêjî dikir Hozan Kazo di temenê piçûk de stran strandin. Kalê wî Ecemê Kinin di dema Paşayê Zor Huseyîn de dengbêjî kiriye. Hê emrê xwe yê biçûk li gel Hecî Ebdulkerîm û Tahîro stranan gotiye. Bi giştî 50 kasedên Dengbêj Kazo hene. Ji Mihemed Arifê Cizwarî û Şeroyê Biro gelek bandor bûye. Di salên 90î de bi kesên ji malbata xwe re Koma Şîrvan ava kir. 26 albumên bibandrol derxistine.
