Partiyên siyasî û saziyên sivîl ên Wanê, bi pêşengiya KURDÎGEHê têkildarî êrîşa polîsan a li ser malbata Kurd a Stenbolê, daxuyaniyek dan û xwestin faîlên êrîşê bên cezakirin.
Partiyên siyasî û saziyên sivîl bi pêşengiya Komeleya Pêşvebirina Çand û Zimanê Kurdî (KURDÎGEH) ji bo malbata Kaya ku li Stenbolê ji ber ku muzîka Kurdî guhdarî dikin rastiyê îşkenceya polîsan hatibûn, li Kolana Hunerê ya Wanê daxuyaniyek dan. Di daxuyaniyê de pankarta “Zimanê Kurdî xeta me ya sor e, destên xwe jê vekişînin” hat vekirin û dirûşmên “zimanê me rûmeta me ye” û “bê ziman jiyan nabe” hatin berzkirin. Parlementerên DEM Partiyê yên Wanê Gulcan Kaçmaz Sayîgît û Zulkuf Ûçar, hevserok û rêveberên DBP û DEM Partiyê, DADSAZ, ÎHD, OHD, Meclîsa Ciwanan a DEM Partiyê, endam û nûnerên saziyên sivîl tev li daxuyaniyê bûn.
‘Êrîşên bi vî rengî civaka Kurd dike nav fikaran’
Rêveberê KURDÎGEHê Gokhan Işik, metna daxuyaniyê xwend û da zanîn ku êrîşkariya li ser ziman û muzîka kurdî jî di eslê xwe de êrîşkirina li nasname û hebûna kurdan e û hişmendiya dijminane ya wan polîsan û vê pergala heyî nîşan dide. Gokhan Işik, diyar kir ku divê bê zanîn ziman û çanda kurdî nasname û rûmeta gelê kurd e û got: “Nabe ku li tu derê bi tu awayî werin biçûkxistin, bibin sedema cudakariyê yan jî ji ber nirxên gelê kurd, tundî li kurdan bê kirin. Em wek saziyên ziman û çanda kurdî, ev êrîş jî tê de, hemû êrîşên li ser ziman û çanda kurdî şermezar dikin û bang li rayedaran dikin ku kiryarên / failên van êrîşan ceza bikin. Divê baş bê zanîn ku pêkhatina van êrîşan û rûdana vê êrîşkariyê civaka kurd dike nav fikaran û atmosfera aştiyê jehrî dike.”
‘Statu û perwerdehiya Kurdî nas bikin’
Gokhan Işik, anî ziman ku êdî lazim e ku ev pergala cudakarî, tundî û bêtehemiliyê demildest bê guhertin û bi peymaneke civakî ya pirrengî, demokrasî û azadiya jinan rûpeleke nû bê vekirin. Gokhan Işik, destnîşan kir ku divê neyê jibîrkirin ku ev bêtehemilî û tundî encameke polîtîkaya sed salî ya înkarkirin, tunehesibandin û asîmîlasyonê ye û wiha berdewam kir: “Ev polîtîka û pergala li ser wê avabûyî tevahiya civakê jehrî dike û rê li ber aştiyeke mayînde digire. Em careke din diyar dikin ku zimanê kurdî xeta me ya sor e. Ji bo aştiyeke mayînde, di vê pêvajoyê de ku divê reform û guhertin bên kirin û gavên erênî li ser çand û zimanê kurdî bên avêtin, mafê gelê kurd ê statuya ji bo kurdî û perwerdeya bi kurdî bê naskirin.”
‘Em ê têkoşîna xwe bilindtir bikin’
Gokhan Işik, bi van gotinan dawî li axaftina xwe anî: “Dubare em vê êrîşê û hişmendiya li paş wê bi tundî şermezar dikin, banga avêtina gavên pêwîst dikin û careke din dibêjin ku aştî bi naskirina hiqûqa hev û din û rêzgirtina li hev û din pêkan e. Em li dijî vê tundiyê bêdeng namînin û vê hişmendiya tundiya mêrperest bi awayê herî xurt şermezar dikin û destnîşan dikin ku em ê têkoşîna parastin û pêşvebirina zimanê kurdî li her derê bilindtir bikin.”
